24 сакавіка ў Кіеўскім сквэры Менску Кансэрватыўна-хрысьціянская партыя — БНФ праводзіць сьвяточныя мітынг і канцэрт, прысьвечаныя стагадоваму юбілею ўтварэньня Беларускай Народнай Рэспублікі.
Мерапрыемствы дазволеныя Менгарвыканкамам з 12 да 16 гадзіны.
Канцэрт у Кіеўскім сквэры ў Менску да #БНР100. ФОТА
Падчас акцыі быў зачытаны прывітальны ліст ад старшыні КХП-БНФ Зянона Пазьняка з нагоды 100-гадовага юбілею абя’ўленьня незалежнасьці БНР.
«Гэта вельмі важная падзея ў разьвіцьці нашай нацыі. Яна пазначыла далейшы гістарычны шлях Беларусі.Сьведчаньне аб намеры ўтварэньня дзяржавы і аб’яўленьне яе незалежнасьці — гэта ёсьць чыньнік перамогі нацыянальнай ідэі», — гаворыцца ў лісьце.
У акцыі ўзялі ўдзел актывісты КХП-БНФ Алесь Чахольскі, Сяргей Папкоў, экс-дэпутат Вярхоўнага Савету Сяргей Антончык, былы фігурант справы «Белага легіёну» Міраслаў Лазоўскі, мастак Алесь Марачкін і іншыя.
У канцэрце бяруць удзел Зьміцер Вайцюшкевіч, Андрусь Такінданг, Сяржук Чарняк, Зьміцер Захарэвіч, Яўгеня Казлова, Андрэй Мельнікаў, Уладзімер Асадчы і іншыя.
«Гэтую акцыю можна разглядаць таксама як пачатак сьвяткаваньня і пралёг да ўрачыстага мітынгу і канцэрта, які адбудзецца 25-га сакавіка каля Вялікага тэатра опэры і балету ў Менску», — гаворыцца на сайце партыі.
Партыя Зянона Пазьняка запрасіла ахвочых далучацца да гэтага сьвяточнага мерапрыемства.
Удзельнікі акцыі зьбіралі сродкі на ўсталяваньне памятнага каменя ў гонар 100-гадовага юбілею абвяшчэньня незалежнасьці БНР.
Яго прапануецца ўсталяваць у сквэры каля тэатра імя Янкі Купалы — гістарычным будынку, дзе ў сьнежні 1917 года адбыўся Усебеларускі нацыянальны кангрэс.
Таксама працягваўся збор сродкаў на народны мэмарыял у Курапатах.
25 сакавіка мітынг і канцэрт, прысьвечаныя 100-годзьдзю БНР, пачнуцца каля Опэрнага тэатру а 13-й гадзіне. Яны таксама санкцыянаваныя ўладамі.