Лінкі ўнівэрсальнага доступу

Цукербэрг упершыню пракамэнтаваў уцечку дадзеных 50 мільёнаў карыстальнікаў Facebook


Марк Цукербэрг

Заснавальнік сацыяльнай сеткі Facebook Марк Цукербэрг заявіў, што кампанія прааналізуе ўсе праграмы, якія маюць доступ да значнай колькасьці інфармацыі карыстальнікаў, а таксама правядзе поўную праверку любой праграмы з падазронай актыўнасьцю.

«Я запусьціў Facebook, і ў рэшце рэшт я адказваю за тое, што адбываецца на нашай плятформе. Я сур’ёзна стаўлюся да таго, што трэба для абароны нашай супольнасьці. Хоць гэтая канкрэтная праблема, зьвязаная з Cambridge Analytica, больш не павінна паўтарыцца з новымі праграмамі... Мы будзем вучыцца на гэтым вопыце, каб засьцерагчы нашу плятформу яшчэ больш», — напісаў ён на сваёй старонцы ў Facebook.

Цукербэрг паабяцаў, што кампанія будзе ствараць лепшы сэрвіс у доўгатэрміновай пэрспэктыве.

«На мінулым тыдні мы даведаліся ад The Guardian, The New York Times і Channel 4, што кампанія Cambridge Analtica, магчыма, ня выдаліла дадзеныя, паколькі яны былі сэртыфікаваныя. Мы адразу забаранілі ім карыстацца любымі з нашых сэрвісаў. Cambridge Analtica сьцьвярджае, што яны ўжо выдалілі дадзеныя і пагадзіліся на праверку фірмай, якую мы нанялі, каб пацьвердзіць гэта. Мы таксама супрацоўнічаем са сьледчымі, якія расьсьледуюць, што адбылося», — напісаў Цукербэрг.

Ён адзначыў, што гэты скандал быў парушэньнем даверу паміж кампаніяй Cambridge Analtica, дасьледчыкам Аляксандрам Коганам і Facebook, а таксама паміж сацсеткай і карыстальнікамі.

У Вялікай Брытаніі працягваецца расьсьледаваньне справы Cambridge Analytica. Кампанію абвінавачваюць у тым, што яна выкарыстоўвала дадзеныя больш чым 50 мільёнаў карыстальнікаў Facebook бязь іх згоды для вывучэньня выбарнікаў у інтарэсах кампаніі Дональда Трампа і рассыланьні для карыстальнікаў палітычнай рэклямы з мэтай уплыву на іх перадвыбарчыя настроі.

З-за абвінавачваньняў кошт акцыяў кампаніі Facebook 19 сакавіка зьнізіўся на 7%, што ў цэлым можа раўняцца 30 мільярдам даляраў.

Скандал вакол «уцечкі дадзеных» Facebook. Што такое Cambridge Analytica і прычым тут Трамп з Расеяй

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG