Лінкі ўнівэрсальнага доступу

Жанчыне, якая скінула сабаку з восьмага паверху, прысудзілі паўтара года


Жанчына, асуджаная за тое, што выкінула сабаку з вакна шматпавярховага дома

36-гадовую жыхарку Віцебску судзілі адразу па двух артыкулах Крымінальнага кодэксу: за жорсткае абыходжаньне з жывёлай і за збыт скрадзенай завушніцы. Пакараньне прызначана па сукупнасьці прысудаў — паўтара года абмежаваньня волі безь зьмяшчэньня ў папраўчую ўстанову. Акрамя таго, жанчыну прымусова накіруюць на лячэньне ад алькагалізму.

Працэс у судзе Першамайскага раёну распачаўся 2 сакавіка, старшынявала на ім судзьдзя Алена Протас. Абвінавачаная Марына К. прызнала сваю віну, кваліфікаваную паводле ч.1 артыкула 339 Крымінальнага кодэксу «Жорсткае абыходжаньне з жывёлай, якое прывяло да сьмерці або калецтва, зьдзейсьненае з хуліганскіх, карысьлівых ці іншых нізкіх пабуджэньняў альбо ў прысутнасьці заведама малалетняга».

Адзінае, што яна спрабавала аспрэчыць — гэта прысутнасьць дачкі падчас таго, як яна скінула сабаку з балькона сваёй кватэры. Жанчына пераконвала суд, што не жадала сьмерці сабакі, а толькі хацела яго «правучыць».

Раззлавалася, схапіла сабаку і шпурнула яго з балькона

Інцыдэнт здарыўся 26 лістапада. У той дзень да Марыны прыйшла сяброўка, прынесла чатыры літры піва. Пілі на траіх — Марына, яе сяброўка і брат. Дома была і Марыніна адзінаццацігадовая дачка.

Пасярод ночы падсудная прачнулася, пайшла на кухню і наступіла ў лужыну. Паводле ейных словаў, сабака быў «нявыхаваны» і часта спраўляў патрэбу ў кватэры. Жанчына кажа, што раззлавалася, схапіла сабаку і з размаху шпурнула яго з балькона.

У судзе яна сьведчыла, што зьбіралася спусьціцца ўніз і забраць жывёліну, бо ня ведала, што тая заб’ецца. Аднак, пакуль зьбіралася, у кватэру прыйшла міліцыя.

Міліцыянтаў выклікалі выпадковыя мінакі, якія сталі сьведкамі здарэньня. Яны чулі крыкі на верхніх паверхах. Пра сварку Марыны з дачкой казалі і бліжэйшыя суседзі.

Сабака па мянушцы Віта жыў у сямʼі з чэрвеня 2017 году. Цяпер у Марыны таксама ёсьць жывёлы — іншы сабака і кот. У адной кватэры з гаспадыняй жыве яе брат, а непаўналетнія дзеці гадуюцца асобна: малодшую дачку пасьля інцыдэнту з сабакам перадалі пад апеку сваячцы, а старэйшая, 15-гадовая, ужо колькі год жыве з бацькам і бабуляй.

Шкадуе пра ўчыненае, хавала твар ад камэр

Акрамя жорсткага абыходжаньня з жывёлай, суд разгледзеў другі эпізод, кваліфікаваны паводле часткі 1 артыкула 236 Крымінальнага кодэксу «Набыцьцё або збыт матэрыяльных каштоўнасьцяў, заведама здабытых злачынным шляхам». У лютым 2017 году абвінавачаная здала ў лямбард завушніцу, якую прынесла ёй сяброўка. «Трафэй» быў знойдзены на месцы бойкі з суседкай. На атрыманыя ў лямбардзе грошы — 40 рублёў — Марына купіла ласункі сваёй дачцэ і дзецям сяброўкі.

Матэрыяльная шкода за скрадзеную завушніцу ўжо кампэнсаваная. За гэтае злачынства судзьдзя пастанавіла пакараць абвінавачаную абмежаваньнем волі. За забойства сабакі ў прысутнасьці непаўналетняй дачкі — штрафам памерам 100 базавых велічынь. Аднак у сілу таго, што большае пакараньне паглынае меншае, выніковым выракам стала абмежаваньне волі на паўтара года безь зьмяшчэньня ў папраўчую ўстанову.

У сваім апошнім слове Марына К. казала, што шкадуе пра ўчыненае. Цягам усяго судовага працэсу яна ўпарта хавала твар ад фатакамэр журналістаў.

Мянчук, які выкінуў сабаку зь пятага паверху, асуджаны на тры месяцы арышту

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG