На сайце міністэрства абароны Расеі запусьцілі галасаваньне за лепшы варыянт назвы для новай расейскай зброі, пра якую Ўладзімер Пуцін казаў падчас нядаўняга пасланьня Фэдэральнаму сходу.
Прапанову прыдумаць назву для ракеты з ядзерным рухавіком, бесьпілётнай падлодкі і баявога лазэрнага комплексу агучыў сам Пуцін. Ужо ў той жа дзень, 1 сакавіка, на сайце Міністэрства абароны зьявілася форма, з дапамогай якой любы жадаючы мог прапанаваць свае варыянты назваў. Праз 12 дзён былі адабраны самыя папулярныя варыянты (па 50 для кожнага віду зброі) і зараз галасаваць можна толькі за іх. Пераможца конкурсу будзе вызначаны пасьля 16 сакавіка.
Пакуль самай папулярнай прапановай для крылатай ракеты з ядзернай энэргаўстаноўкай стала назва «Нежданчик». На другім месцы — «Император», за трэцяе месца напружаную барацьбу вядуць «Пальмира» і «Ватник». Згадваюцца назвы: «погремушка», «санкция», «Иосиф Сталин», «Чебурашка», «Турист» и «Надюша».
Новы расейскі бесьпілётны падводны апарат, калі ён ня выдумка, можа атрымаць назву ад імя легендарнай марской пачвары — Кракена. Усе астатнія варыянты ідуць у галасаваньні зь вялікім адставаньнем «Язь», «Посейдон», «Карась».
Што да «баявога лазэрнага комплексу», то яго, зь вялікай доляй верагоднасьці, могуць назваць «Офтальмолог». У ліку іншых — «Мухобойка», «Сталыпин» і «Вий».
