Служба бясьпекі Ўкраіны (СБУ) праводзіць ператрусы ў падазраваных у арганізацыі антыўкраінскіх акцый. Пра гэта паведаміла прадстаўніца СБУ Алена Гітлянская. Яна удакладніла, што па ўсёй Украіне прайшло 25 ператрусаў. Паводле яе былі канфіскаваныя прапагандысцкія матэрыялы, зброя і выбухоўка.
Як паведамляе ўкраінская прэса, прадстаўнікі СБУ, у прыватнасьці, прыйшлі ў дом кіеўскага журналіста Юрыя Лукашына. Ператрус у яго доме праводзіўся ў межах крымінальнай справы аб інфармацыйнай агрэсіі супраць Украіны з боку «неўстаноўленых прадстаўнікоў Расейскай Фэдэрацыі і акупацыйных уладаў Крыму». «Прыналежнасьць да прафэсіі ня можа быць індульгенцыяй ад законнай адказнасьці за антыдзяржаўныя дзеяньні», — заявіла Гітлянская.
У лютым прэзыдэнт Украіны Пятро Парашэнка падпісаў закон аб рэінтэграцыі Данбасу. Згодна з дакумэнтам, непадкантрольныя Кіеву тэрыторыі Данецкай і Луганскай абласьцей прызнаныя часова акупаванымі. Расея ў законе названая краінай-агрэсарам. Гэта значыць, што адказнасьць за парушэньне правоў і свабод чалавека ў рэгіёне Ўкраіна ускладае на Расейскую Фэдэрацыю. У расейскім Міністэрстве замежных спраў тады заявілі, што дакумэнт стварае пагрозу для выкананьня Менскіх пагадненьняў па ўрэгуляваньні ўзброенага канфлікту на ўсходзе Ўкраіны.
