Лінкі ўнівэрсальнага доступу

Усе слонімскія нерэгулярныя маршруткі спынілі рэйсы на Менск


Ілюстрацыйнае фота

Цяпер са Слонімскага аўтавакзалу да Менску адпраўляецца адзін мікрааўтобус у дзень.

Пяць перавозчыкаў з Слоніма пацьвердзілі Свабодзе, што ня выйшлі ў рэйс.

Прыватная кампанія «МрояТур» — адзін з найбуйнейшых перавозчыкаў. Ейны дырэктар Уладзімер Лазар патлумачыў Свабодзе, што з 5 сакавіка іх дзейнасьць па пасажырскіх перавозках прыпыненая з прычыны ўвядзеньня з 26 лютага зьменаў у «Закон аб аўтамабільным транспарце і аўтамабільных перавозках».

«Мы ўсе ўжо вельмі стаміліся ад гэтага, — кажа Ўладзімер Лазар. — Так, як і іншыя прыватныя перавозчыкі, атрымалі папярэджаньне ад дзяржаўных органаў».

Паводле Лазара, кампанія прыпыніла працу, каб прыцягнуць увагу грамадзкасьці да цяперашняга стану рэчаў.

«Мы чакаем, што ўсё ж павінны быць унесены зьмены ў гэты закон, хоць ён і нядаўна прыняты, паколькі пралікі дапушчаны яўныя, — кажа дырэктар кампаніі „МрояТур“. — Аднак, як відаць на справе, гавораць усе шмат, але нічога канкрэтнага ня робіцца».

Маршрутка «МрояТур» ехала да Менску 2,5 гадзіны. Квіток каштаваў 9 рублёў, для дзяцей да 10 гадоў — 5 рублёў. Практыкаваліся сэзонныя зьніжкі, кожная восьмая паездка была бясплатная.

Цяпер з слонімскага аўтавакзалу на Менск адпраўляецца адзін рэйс на суткі — транзытны мікрааўтобус у 7:55. Білеты на яго можна купіць толькі па прыбыцьці і толькі калі будуць месцы. Цана — амаль 12 рублёў.

Да Менску можна дабрацца таксама двума міжгароднімі цягнікамі — увечары і глыбокай ноччу, — і чатырма прыгараднымі цягнікамі зь перасадкай у Баранавічах. Дарога чыгункай зойме 4–6 гадзін.

Больш за 20 тысяч подпісаў сабрана пад пэтыцыямі ў абарону маршрутак

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG