Лінкі ўнівэрсальнага доступу

Расея: загадкавая справа пра 400 кіляграмаў какаіну абрастае новымі падрабязнасьцямі


Масква. Затрыманьне падазраваных у кантрабандзе наркотыкаў з Аргентыны.

Гісторыя выяўленьня амаль 400 кіляграмаў какаіну на тэрыторыі школьнага комплексу пры пасольстве Расеі ў Буэнас-Айрэсе і наступнай транспарціроўкі падмененага паліцыяй грузу на тэрыторыю РФ абрастае ўсё новымі падрабязнасьцямі.

Высьвятляецца, што для транспарціроўкі мукі, на якую наркотык падмяніла паліцыя Аргентыны, быў выкарыстаны самалёт, на якім краіну наведаў сакратар Рады Бясьпекі РФ Мікалай Патрушаў.

Акрамя таго, адзін з тых, хто павінен быў арганізаваць дастаўку какаіну ў Маскву, — былы загадчык гаспадаркі расейскай амбасады Алі Абьянаў, быў упэўнены, што робіць гэта на просьбу куратара з расейскіх спэцслужбаў.

Як разгортваліся падзеі

13 сьнежня 2016 году новы загадчык гаспадаркі амбасады Расеі ў Буэнас-Айрэсе падчас рэвізіі складзкіх памяшканьняў на тэрыторыі школьнага комплексу пры пасольстве выявіў 12 абклееных клейкай стужкай валізаў. Ён паведаміў аб сваёй знаходцы паслу Віктару Каранэлі, які, у сваю чаргу, інфармаваў аргентынскія праваахоўныя органы і даў ім доступ да падазроных пакетаў.

У валізах выявіліся 389 кіляграмаў какаіну, які быў спакаваны ў брыкеты і праштампаваўшы таўром ў выглядзе зоркі. Наркотык аказаўся рэдкай чысьціні — 88 адсоткаў какаіну былі зьмешаныя з 12 адсоткамі левамізолу — вэтэрынарнага глістагоннага сродку, які, як лічыцца, узмацняе эфэкт наркотыку, бо стымулюе сымпатыйную нэрвовую сыстэму.

Какаін такой чысьціні — у 2-3 разы больш высокай, чым у «вулічных» дозах ў Эўропе і Расеі — хутчэй за ўсё, быў выраблены ў Калюмбіі.

Валізы з наркотыкам на тэрыторыі школы пакінуў былы загадчык гаспадаркі амбасады Алі Абьянаў, які лета 2016 году вярнуўся ў Маскве пасьля заканчэньня часовага кантракту. Як сьцьвярджае адвакат Абьянава, той распавёў аб пакінутых рэчах свайму пераемніку, новаму загадчыку гаспадаркі, і папярэдзіў, што за імі прыедзе ўладальнік — нехта Андрэй Кавальчук.

12 масіўных валізаў некалькі месяцаў нікому не трапляліся на вочы. «Груз быў старанна схаваны, у гэтым будынку шмат складзкіх падвальных памяшканьняў», — патлумачыў гэтую акалічнасьць у інтэрвію РБК пасол Віктар Каранэлі.

Прэзыдэнт Аргентыны Маурысыё Макра. Зь яго імем, у прыватнасьці, звязваюць антыкарупцыйную рэформу, якая закранула і паліцыю
Прэзыдэнт Аргентыны Маурысыё Макра. Зь яго імем, у прыватнасьці, звязваюць антыкарупцыйную рэформу, якая закранула і паліцыю

Паводле афіцыйнай вэрсіі, з моманту выяўленьня какаіну паліцыя Аргентыны сумесна з расейскімі спэцслужбамі рыхтавала сакрэтную апэрацыю з мэтай затрымаць усіх датычных да меркаванай кантрабандзе наркотыкаў.

Какаін быў заменены на муку, якую давялося спэцыяльна для гэтага купіць на аптовым рынку — у ніводнай з крам не знайшлося патрэбнай колькасьці. Таксама ў валізы паклалі GPS-маякі, але амаль год за грузам ніхто не прыяжджаў.

Як вынікае з расшыфроўкі перамоваў злачынцаў, апублікаванай пасьля аргентынскай прэсай, яны шукалі спосабы даставіць какаін у Расею, спрабуючы прыцягнуць да гэтага дзеючых супрацоўнікаў пасольства, у прыватнасьці нейкага «А» — верагодна памочніка пасла ў галіне бясьпекі Алега Вараб’ёва. Як можна меркаваць па расшыфроўцы, Вараб’ёў дапамагчы адмовіўся.

Затрыманьні

У рэшце рэшт у амбасаду РФ зьвярнуўся з Масквы сам Алі Абьянаў, які папрасіў даслаць яму пакінутыя ў Буэнас-Айрэсе асабістыя рэчы праз дыпляматычную кур’ерскую службу. У пачатку сьнежня 2017 году валізкі былі загружаныя на самалёт і адпраўленыя ў Маскву, празь некалькі дзён па іх прыйшлі на падмаскоўны склад Уладзімір Калмыкоў і Іштымір Худзамаў. Яны, а таксама Алі Абьянаў у яго маскоўскай кватэры, былі затрыманыя.

Празь месяц, у канцы лютага 2018 году, у Буэнас-Айрэсе былі затрыманыя затрыманыя выхадзец з Расеі, афіцэр аргентынскай паліцыі Іван Блізьнюк і Аляксандр Чыкала — тэхнічны супрацоўнік аэрапорту.

Аргентынская прэса паведамляе, што Блізьнюк адказваў у паліцыі Буэнас-Айрэсу, сярод іншага, за сувязі з расейскімі праваахоўнымі органамі. Ён рэгулярна бываў у Расеі, у прыватнасьці, у 2016 годзе праслухаў курс «Выпрацоўка навыкаў патрульна-паставой службы» ў Маскоўскім унівэрсытэце МУС імя Кікаця.

Праваслаўныя мэцэнаты

Блізьнюк праз прыватнае ахоўнае агенцтва аказваў паслугі ў галіне бясьпекі амбасадзе Расеі, часам дапамагаў зь перакладам, у тым ліку міністру бясьпекі Аргентыны Патрысіі Булрыч. Акрамя таго, Блізьнюк зьяўляецца віцэ-прэзыдэнтам клюбу Mecenas Ortodoxos Rusos En America Latina (MORAL) — «Расейскія праваслаўныя мэцэнаты ў Лацінскай Амэрыцы», праз які, магчыма, ён і пазнаёміўся з Аляксандрам Чыкала, кіраўніком той жа арганізацыі.

Задачай Абьянава і Блізьнюка было тым ці іншым спосабам, выкарыстоўваючы свае магчымасьці ў амбасадзе і паліцыі, арганізаваць дастаўку грузу з Аргентыны ў Расею. Чыкала павінен быў дапамагчы ім у аэрапорце.

Хто кіраваў кантрабандай

Заказчыкам і ідэолягам апэрацыі быў Андрэй Кавальчук. Аргентынскія СМІ называюць яго расейскім прадпрымальнікам, які працуе ў Нямеччыне: нібыта гамбурская фірма Кавальчука займаецца імпартам і экспартам прэміяльных тавараў — цыгараў, ікры і алькаголю.

Выданьне «Росбалт» сьцьвярджае, што Кавальчук працаваў тэхнічным супрацоўнікам расейскай амбасады ў Бэрліне, хоць МЗС Расеі настойвае, што гэта ня так. Адвакат Абьянава Аляксандар Кастанянц у камэнтары для РБК распавёў, што яго падабаронны пазнаёміўся з Андрэем Кавальчуком ў Бэрліне прыкладна ў 2011 годзе і заўсёды лічыў яго куратарам дыпляматаў з боку расейскіх спэцслужбаў.

«Кавальчук ўвайшоў да яго ў давер, пераконваў, што уваходзіць у кола высокапастаўленых дыпляматаў. У Абьянава не было сумневаў, што гэта прыстойны сілавік», — настойвае Кастанянц і распавядае, што яго падапечны нават пасаромеўся спытаць у Кавальчука пра яго працу наўпрост.

Дастаўка на самалёце сакратара Рады Бясьпекі Патрушава

Ускосныя факты паказваюць на тое, што ў выніку валізы былі адпраўленыя ў Маскву на запыт Алі Абьянава на самалёце сакратара Рады Бясьпекі Расеі Мікалая Патрушава.

Сакратар Рады Бясьпекі Расеі Мікалай Патрушаў
Сакратар Рады Бясьпекі Расеі Мікалай Патрушаў

Першым гэтую вэрсію агучыла брытанскае выданьне The Telegraph, якое сьцьвярджае, што гэта было «сакрэтная мэтай» візыту Патрушава ў Аргентыну.

Крыніца агенцтва «Інтэрфакс» заявіла, што «гэта чыясьці фантазія і фэйк. Гэты самалёт не выкарыстоўваецца для перавозкі дыпляматычнай пошты і дыпляматычных грузаў». Зрэшты, ніхто не сьцьвярджаў, што муляж наркотыкаў быў адпраўлены ў якасьці дыпляматычнай пошты — гэта былі спэцапэрацыя, і сакратар Рады Бясьпекі, відавочна, ведаў пра яе.

Нацыянальная жандармэрыя Аргентыны апублікавала фота і відэа з пагрузкай валізаў у расейскі самалёт, і на іх лёгка разгледзець яго бартавы нумар — 96023. З адкрытых крыніц вядома, што гэты нумар належыць самалёту Іл-86, які ў студзені 2016 году ўвайшоў у адмысловы лётны атрад «Расея» — ён абслугоўвае палёты вышэйшых дзяржаўных чыноўнікаў РФ.

Паводле дадзеных сайтаў FlightRadar і Russianplanes. net (з апошняга пасьля скандалу стваральнік выдаліў усе дадзеныя), гэты борт 4 сьнежня быў у аэрапорце сталіца Бразыліі, а 5 сьнежня — у аэрапорце Буэнас-Айрэсу, што пацьвярджаецца назіраньнямі аргентынскага авіяспотэра, які назіраў, як ляйнэр з нумар 96023 прызямліўся ў аэрапорце Эйсэйры ў аргентынскай сталіцы позна вечарам 5 сьнежня і пакінуў яго прыкладна праз суткі.

Гэта дакладна адпавядае графіку візытаў Патрушава, які 4 сьнежня сустракаўся з кіраўніком камітэту бясьпекі Бразыліі, а на наступны дзень — з прэзыдэнтам Аргентыны Маурысыё Макра.

Афіцыйная рэакцыя

Ва Упраўленьні справамі прэзыдэнта РФ называюць недакладнай інфармацыю аб датычнасьці самалёта спэцыяльнага лётнага атраду «Расея» да «какаінавага скандалу» ў Аргентыне. «Журналісты зрабілі высновы на падставе недакладнай інфармацыі — у дадзеным выпадку фатаграфіі, якую, дзякуючы сучасным тэхналёгіям, можна лёгка фальсыфікаваць», — сказала прадстаўніца ведамства Алена Крылова.

Пасол Віктар Каранэлі ўдзел самалёта Патрушава ў апэрацыі камэнтаваць адмовіўся, спаслаўшыся на тое, што пытаньне знаходзіцца не ў яго кампэтэнцыі.

Расейскі МЗС настойвае, што да кантрабанды наркотыкаў датычны толькі былы загадчык гаспадаркі аргентынскай амбасады Алі Абьянаў, а дзейныя дыпляматы, наадварот, дапамаглі раскрыць злачынства.

Неафіцыйны камэнтар

У гэты вераць ня ўсё. Прафэсар IE Business School ў Буэнас-Айрэсе расеец Максім Міронаў упэўнены, што праз пасольства быў арганізаваны паўнавартасны канал наркатрафіку. Дзеці Міронава вучацца ў школе пры пасольстве РФ у Буэнас-Айрэсе (у пасольстве сьцьвярджаюць, што вучацца завочна, прылятаючы туды з Гішпаніі ўсяго некалькі раз у год).

Міронаў упэўнены, што рэжым бясьпекі наладжаны такім чынам, што Абьянаў ня мог на працягу некалькіх месяцаў быць адзіным супрацоўнікам, які ведаў пра незвычайны груз, якi захоўваецца на складзе.

Расьсьледаваньне справы працягваецца.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG