У Інгушэтыі 23 лютага праходзяць афіцыйныя мерапрыемствы ў памяць пра ахвяраў сталінскай дэпартацыі чачэнцаў і інгушоў. У Назрані ля Мэмарыялу памяці і славы прайшоў жалобны мітынг з удзелам кіраўнікоў рэгіёну, духоўных лідэраў і жыхароў рэспублікі. У мячэцях чыталі малітвы, прысьвечаныя 74-й гадавіне дэпартацыі.
У Чачні ўжо некалькі гадоў не праводзяцца афіцыйныя мерапрыемствы памяці ахвяраў сталінскай дэпартацыі. Дзень памяці і смутку, які адзначаўся доўгі час 23 лютага, у красавіку 2011 года быў забаронены. У гэты дзень чачэнцы павінны адзначаць агульнарасейскія сьвяты, у прыватнасьці, Дзень абаронцы Айчыны. У 2012 годзе кіраўнік Чачні перанёс Дзень памяці і смутку на 10 траўня — дату пахаваньня свайго бацькі, былога прэзыдэнта Чачні Ахмата Кадырава.
Між тым акцыі памяці ахвяр сталінскай дэпартацыі праходзяць у многіх гарадах Эўропы і ЗША — у Парыжы, Страсбургу, Нанце, Ніцы і Тулузе, а таксама ў Гаазе, Бэрліне, Вене, Осла, Стакгольме, Хэльсынкі, Тбілісі, Стамбуле і Нью-Ёрку. Пра гэта паведамляе сайт «Кавказ.Реалии».
23 лютага 1944 гады пачалася дэпартацыя амаль 650 тысяч інгушоў і чачэнцаў у Сярэднюю Азію і Казахстан. Палова дэпартаваных загінулі ў дарозе. У 1957 году выжылым чачэнцам і інгушам дазволілі вярнуцца дадому.
У 2004 годзе Эўрапарлямэнт прызнаў дэпартацыю чачэнцаў і інгушоў актам генацыду.