Сакратар Рады нацыянальнай бясьпекі Ўкраіны, былы выканаўца абавязкаў прэзыдэнта Аляксандар Турчынаў заявіў, што ніколі не даваў загадаў фізычна зьнішчыць экс-прэзыдэнта Віктара Януковіча. Пра гэта, як паведамляе «Ўкраінская праўда», ён заявіў падчас допыту ў судзе ў справе аб дзяржаўнай здрадзе Віктара Януковіча.
«Я не даваў каманду нікому ліквідаваць, ці страляць, ці яшчэ нешта рабіць, што пагражала б жыцьцю Януковіча», — сказаў ён.
«Няхай хаця б адзін чалавек скажа, што я такі загад даваў. Такога ніколі не было і не магло быць. Больш за тое, вельмі важна, каб Януковіч быў жывы ва Ўкраіне. Важна было, каб ён добраахвотна напісаў заяву аб складаньні паўнамоцтваў, і спакойна сядзеў на лаве падсудных, і адказваў за тыя злачынствы, якія ён учыняў або якія яму інкрымінуюць», — сказаў ён.
У судзе Турчынаў таксама заявіў, што Віктар Януковіч ня мог заставацца прэзыдэнтам ня толькі з прычыны ўцёкаў, але і з прычыны сваіх неканстытуцыйных дзеяньняў.
Турчынаў таксама паведаміў пры дачы паказаньняў, што 28 лютага 2014 году яму патэлефанаваў старшыня Дзяржаўнай думы РФ Сяргей Нарышкін і пагражаў. Ён паведаміў, што Расейская Фэдэрацыя прызнае Турчынава толькі як старшыню Вярхоўнай Рады і прынцыпова не прызнае ягоныя паўнамоцтвы як выканаўцы абавязкаў прэзыдэнта. «Яны лічаць, што мы сілай захапілі ўладу», — сказаў Турчынаў.
Паводле Турчынава, прадстаўнік расейскай улады падкрэсьліў, што легітымным прэзыдэнтам у РФ лічаць Януковіча. І менавіта ад яго гатовыя ўспрымаць любую інфармацыю:
«Нарышкін пачаў пагражаць, што ў выпадку гібелі расейскамоўных грамадзян яны маюць патэнцыял, здольны зьнішчыць і новую ўкраінскую ўладу, і фактычна гаворка ішла пра ўварваньне РФ ва Ўкраіну», — заявіў Турчынаў.
Далей Турчынаў сказаў Нарышкіну, што Расея парушае ўсе міжнародныя дамовы, ня мае ні палітычных, ні юрыдычных падставаў знаходзіцца на тэрыторыі Ўкраіны. «На што Нарышкін адказаў, што ў РФ будуць усе падставы», — паведаміў Турчынаў.
Паводле Турчынава, гаворка ішла пра тое, што на наступны дзень парлямэнт Расеі даў дазвол уводзіць войскі ва Ўкраіну, а палітычнай падставай быў зварот Януковіча да Пуціна.
