Лінкі ўнівэрсальнага доступу

«Гэта чарговая „фраў А.“». Апазыцыя пра нападкі дзяржаўных тэлеканалаў на незалежнае назіраньне


Падлік галасоў на парлямэнцкіх выбарах 2016 году

8 лютага дзяржаўныя тэлеканалы Беларусь 1 і АНТ паказалі падобныя сюжэты, у якіх сьцьвярджалася, што кампанія незалежнага назіраньня «Права выбару-2018»​ ужо падрыхтавала гатовыя скаргі на парушэньні і заяву аб непрызнаньні мясцовых выбараў. Свабода пацікавілася, што думаюць пра гэтыя абвінавачаньні ўдзельнікі кампаніі.

Што сказалі па БТ

Нібыта гэтую інфармацыю, а таксама аўдыёзапісы выказваньняў каардынатара кампаніі выклала ў сацсетках карыстальніца пад нікам «Птушка пеўчая». Маўляў, у кампаніі «да выбараў усё гатова, а назіральнікі — у чаканьні абяцаных грошай за працу».

Чым займаецца «Права выбару»

«Права выбару» ўжо ня першы год праводзіць назіраньне за выбарчымі кампаніямі. Яна аб’ядноўвае восем палітычных і грамадзянскіх структур: Партыю БНФ, БХД, Беларускую сацыял-дэмакратычную партыю (Грамада), рух «За свабоду», Аб’яднаную грамадзянскую партыю, Беларускую партыю «Зялёныя», аргкамітэт Партыі свабоды і прагрэсу і незалежны прафсаюз Радыёэлектроннай прамысловасьці.

Кампанія ставіць за мэту «мабілізацыю валянтэраў ня толькі для фіксацыі, але і для актыўнага процідзеяньня парушэньням».

«Гэта спроба дыскрэдытацыі вынікаў назіраньня»

Нацыянальны каардынатар «Права выбару» Аляксандар Сілкоў зьмясьціў у фэйсбуку першую рэакцыю на сюжэты дзяржаўных тэлеканалаў.

«Выснова — 1. На правільным шляху. 2. Толькі адкрыты і галосны падлік галасоў. 3. Чуткі пра слабасьць і разьяднанасьць апазыцыі моцна перабольшаныя. 4. Падрабязнасьці пазьней. 5. І самае галоўнае — дзякуй за падтрымку».

Алесь Сілкоў
Алесь Сілкоў

Зьвязацца зь Сілковым карэспандэнту Свабоды не ўдалося. Аднак сытуацыю пракамэнтаваў Юрась Губарэвіч, старшыня руху «За свабоду» — аднаго з удзельнікаў кампаніі.

— Дзяржаўныя тэлеканалы нават ня сталі шукаць рэальную дзяўчыну, якая хаваецца пад нікам «Птушка пеўчая», а выклалі допіс у эфір, як і аўдыёзапісы.

— Гэта, хутчэй за ўсё, чарговая «фраў А.» ці «фрау Б.», у спэцслужбаў Беларусі вялікі альфабэт. Я мяркую, што гэта цалкам альбо часткова сфальшаваны запіс, бо тут без правядзеньня адпаведнай экспэртызы немагчыма казаць дакладна, ці тыя цытаты, якія прыпісваюцца пэўным людзям, насамрэч ім належаць. Альбо гэта кампаноўка зь нейкіх спробаў праслухоўваньня падчас сустрэчы людзей, якія абмяркоўваць пляны кампаніі.

Юрась Губарэвіч
Юрась Губарэвіч

— Дзеля чаго, на вашую думку, створаны гэтыя тэлесюжэты адразу на двух афіцыйных тэлеканалах?

— Тут можа быць некалькі варыянтаў. Першы, і гэта ўжо відавочна, — гэта спроба дыскрэдытацыі вынікаў назіраньня, якія прадставіць кампанія «Права выбару». На сёньня гэта адзіная буйная кампанія незалежнага назіраньня ў Беларусі. Як вядома, місіі міжнароднага назіраньня будуць адсутнічаць. Усё, што робяць назіральнікі «Права выбару», празрыста і грунтуецца на рэальных фактах.

Як мінімум, гэта спроба дыскрэдытацыі і, магчыма, спроба разгрому ці пачатак спробы разгрому ўсёй сыстэмы незалежнага назіраньня ў Беларусі, як гэта было ў свой час з ініцыятывай «Партнэрства».

10 беларускіх фэйкаў 2017 году: Ад «фраў А.» да Лукашэнкі на Tesla

Ваша меркаваньне

Паказаць камэнтары

XS
SM
MD
LG