Злучаныя Штаты не выключаюць нарошчваньня ядзернага патэнцыялу, баючыся магчымага «першага ўдару» з боку Расеі. Пра гэта гаворыцца ў новай ядзернай дактрыне ЗША.
Асноўнымі сапернікамі ЗША ў дакумэнце называюцца Расея і Кітай. Пры гэтым аўтары дакладу адзначаюць, што Вашынгтон ня мае намеру бачыць у Маскве і Пэкіне праціўнікаў і спадзяецца на стабільныя двухбаковыя адносіны. «Наша стратэгія дазволіць Расеі зразумець, што любое выкарыстаньне ядзернай зброі, хай нават і абмежаванае, непрымальнае», — цытуе вытрымку з дактрыны агенцтва Reuters.
У дакумэнце адзначаецца, што ЗША пасьлядоўна займаліся скарачэньнем ядзернай зброі, тады як Расея і Кітай дзейнічалі ў процілеглым кірунку.
Папярэдняя ядзерная дактрына ЗША была апублікаваная ў 2010 годзе ў часы прэзыдэнцкага праўленьня Барака Абамы.
У сярэдзіне сьнежня 2017 году прэзыдэнт ЗША Дональд Трамп прадставіў новую стратэгію нацыянальнай бясьпекі. Расея і Кітай у ёй названыя «рэвізіянісцкімі дзяржавамі», якія павялічваюць выдаткі на абарону і ўжываюць рэпрэсіўныя меры да грамадзянскай супольнасьці.
