Больш за ўсё затрыманых у башкірскай сталіцы Ўфе — 66 удзельнікаў. На аднаго меней у Валгаградзе (65), у Чабаксарах — 51, у Санкт-Пецярбургу — 19, у Маскве — 16. Акцыі прайшлі больш як у 100 гарадах.
Пасля затрыманьня паліцыя адпусьціла амаль усіх актывістаў. У Маскве на ноч у пастарунках пакінулі супрацоўнікаў «Фонду барацьбы з карупцыяй» Дзьмітрыя Нізоўцава і Аляксандра Памазуева. Першага падазраюць у тым, што ён сам паведаміў пра нібыта закладзеную ў офісе фонду бомбу, празь якую ў памяшканьне ўварваліся сілавікі.
Яшчэ аднаго маскоўскага актывіста, Канстанціна Салтыкова, правяраюць на датычнасьць ва ўжываньні гвалту супраць паліцэйскага.
28 студзеня па ўсёй Расеі пракацілася пратэставая хваля супраць удзелу ў прэзыдэнцкіх выбарах Уладзіміра Пуціна. «Страйк выбарнікаў» арганізаваны апазыцыйным палітыкам Аляксеем Навальным, незарэгістраваным кандыдатам у прэзыдэнты.
Сам Навальны быў затрыманы неўзабаве пасьля зьяўленьня на Цьвярской вуліцы ў Маскве, але ўвечары яго адпусьцілі без складаньня пратаколу.