Лінкі ўнівэрсальнага доступу

Спэцпрадстаўнік Парлямэнцкай асамблеі АБСЭ заклікаў Беларусь да дэмакратычных рэформаў


Кент Гэрстэт

Спэцпрадстаўнік Парлямэнцкай асамблеі АБСЭ па Ўсходняй Эўропе Кент Гэрстэт шкадуе, што працэс рэфармаваньня выбарчага заканадаўства Беларусі не прасоўваецца наперад, і заклікае беларускія ўлады актывізаваць намаганьні па правядзеньні рэформаў.

Пра гэта гаворыцца ў паведамленьні прэс-службы ПА АБСЭ, распаўсюджаным па выніках трохдзённага візыту Гэрстэта ў Беларусь, паведамляе БелаПАН.

«Сталіца Беларусі, Менск, стала амаль сынонімам намаганьняў па рашэньні буйных міжнародных крызісаў, няхай гэта будзе крызіс ва Ўкраіне ці нагорна-карабахскі канфлікт. Улічваючы гэты міжнародны ўнёсак, я таксама заклікаю беларускія ўлады надаць прыярытэтную ўвагу дэмакратычным рэформам, якія забясьпечаць поўны ўдзел усіх беларусаў у дзейнасьці органаў улады», — цытуе прэс-служба Гэрстэта.

Гэрстэт, які выконваў ролю спэцыяльнага каардынатара місій кароткатэрміновых назіральнікаў на апошніх парлямэнцкіх і прэзыдэнцкіх выбарах у Беларусі, выказаў расчараваньне з нагоды таго, што працэс рэформы выбарчага заканадаўства ў Беларусі не прасоўваецца наперад і заклікаў Цэнтральную выбарчую камісію да выкананьня рэкамэндацый, дадзеных Бюро па дэмакратычных інстытутах і правах чалавека АБСЭ па выніках мінулых выбараў.

Спэцпрадстаўнік ПА АБСЭ адзначыў, што ў апошнія гады супрацоўніцтва Беларусі з АБСЭ значна прасунулася. Паводле Гэрстэта, Беларусь робіць значныя намаганьні па падтрыманьні міру ў Эўропе і АБСЭ праз правядзеньне розных міжнародных мерапрыемстваў, у тым ліку мінулагодняй парлямэнцкай сэсіі АБСЭ ў Менску, і таму АБСЭ таксама хоча зрабіць свой унёсак у разьвіцьцё Беларусі: падзяліцца вопытам у сфэрах бясьпекі, эканомікі, абароны навакольнага асяродзьдзя і правоў чалавек.

Гэрстэт таксама заклікаў беларускія ўлады працягнуць працу па пытаньні адмены сьмяротнага пакараньня.

Лукашэнка — АБСЭ: дыялёг сьляпога з глухім

Візыт спэцпрадстаўніка Парлямэнцкай асамблеі АБСЭ ў Беларусь праходзіў 22-24 студзеня. У рамках візыту Кент Гэрстэт сустрэўся ў Менску з Аляксандрам Лукашэнкам, старшынёй Палаты прадстаўнікоў Уладзімірам Андрэйчанкам, міністрам замежных спраў Уладзімірам Макеем, кіраўніком Цэнтрвыбаркаму Лідзіяй Ярмошынай, прадстаўнікамі апазыцыі, грамадзянскай супольнасьці і дыпляматычнага корпусу. Спэцпрадстаўнік ПА АБСЭ таксама наведаў Беларускую гандлёва-прамысловую палату, Парк высокіх тэхналёгій і Беларуска-кітайскі індустрыяльны парк «Вялікі камень».

XS
SM
MD
LG