Польшча будзе працягваць адносна Беларусі курс, абраны два гады таму, незалежна ад таго, хто будзе займаць кіроўныя пасады.
Пра гэта заявіў амбасадар Польшчы ў Беларусі Конрад Паўлік падчас прыёму ў Менску з нагоды завяршэньня сваёй дыпляматычнай місіі.
«Нам удалося вярнуцца да больш рацыянальнага спосабу выбудоўваньня адносінаў па абодва бакі. Гэта ўяўляецца найбольш каштоўным. Сьцьвярджэньне, што ў нашых стасункаў вялізны нявыкарыстаны патэнцыял, было і застаецца актуальным. Патэнцыял ёсьць, і мы павінны працаваць над яго выкарыстаньнем», — сказаў Конрад Паўлік.
Паводле кіраўніка польскай дыпмісіі, клімат, які паляпшаецца паміж Польшчай і Беларусьсю, «прывёў да значнага росту ўзаемавыгаднага таваразвароту».
«Гэту галіну варта асабліва аберагаць ад магчымых ваганьняў», — сказаў Конрад Паўлік.
Пасьля ад’езду зь Беларусі Конрад Паўлік будзе працаваць у Міністэрстве замежных спраў Польшчы.
Раней кіраўнік прэс-службы МЗС Польшчы Артур Лёмпарт паведаміў, што Конрад Паўлік сам прасіў аб адкліканьні, а прыняў адпаведнае рашэньне былы ўжо міністар Вітальд Вашчыкоўскі.