Лінкі ўнівэрсальнага доступу

Рада «Моладзі БНФ»: адлічэньне з БДУ Ганны Сьмілевіч пацьвярджае залежнасьць беларускіх дзяржунівэрсытэтаў ад ідэалягічнай вэртыкалі


Ганна Сьмілевіч

Адлічэньне з другога курсу Інстытута журналістыкі Беларускага дзяржаўнага ўнівэрсытэта старшыні моладзевай арганізацыі Партыі БНФ «Моладзь БНФ» Ганны Сьмілевіч зьяўляецца «грубым парушэньнем акадэмічных свабод, сьведчыць пра адсутнасьць аўтаноміі ўнівэрсытэтаў і цалкам пацьвярджае залежнасьць беларускіх дзяржаўных унівэрсытэтаў ад ідэалягічнай вэртыкалі».

Пра гэта гаворыцца ў адмысловай заяве рады арганізацыі, піша БелаПАН.

«Моладзь БНФ» выказвае занепакоенасьць станам правоў і свабод студэнтаў і выкладчыкаў беларускіх універсітэтаў. Сёньня ў чарговы раз гэтыя правы былі парушаныя. У Інстытуце журналістыкі БДУ пачаўся працэс адлічэньня старшыні «Моладзі БНФ» Ганны Сьмілевіч. Мы лічым гэта адлічэньне палітычна матываваным, бо напярэдадні супрацоўнікі КДБ паводзілі адпаведную працу з выкладчыкамі, распытвалі пра тое, ці не зьяўляецца Ганна Сьмілевіч кіраўніком нейкай моладзевай арганізацыі, як ставіцца да БНФ, БРСМ і гэтак далей. Таксама адзначаем, што да абраньня кіраўніком «Моладзі БНФ» у Ганны Сьмілевіч не было праблем з вучобай, а адразу пасьля абраньня яны зьявіліся», — гаворыцца ў заяве.

Ганна Сьмілевіч
Ганна Сьмілевіч

Па сутнасьці, адзначаюць у «Моладзі БНФ», адміністрацыя дзяржаўных унівэрсытэтаў «прымае рашэньні па адлічэньні студэнтаў без узважанай, справядлівай ацэнкі пасьпяховасьці вучобы, а згодна з загадамі ідэолягаў і спэцслужбаў».

У арганізацыі таксама нагадваюць, што ў сакавіку 2017 году зь першага курсу гістарычнага факультэта БДУ «за актыўную грамадзка-палітычную дзейнасьць (а менавіта за ўдзел у мірнай акцыі па абароне мэмарыялу — месцы расстрэлу рэпрэсаваных „Курапаты“) быў адлічаны экс-старшыня „Моладзі БНФ“ Юры Лукашэвіч».

Юры Лукашэвіч
Юры Лукашэвіч

У цэлым за 2016-2018 гады зь беларускіх унівэрсытэтаў, адзначаюць у «Моладзі БНФ», былі адлічаны каля 15 студэнтаў за іх актыўную грамадзка-палітычную дзейнасьць, у тым ліку за ўдзел у мірных сходах.

«Рэпрэсіі ў дачыненьні да актыўных студэнтаў працягваюцца, ва ўнівэрсытэтах адсутнічае рэальнае самакіраваньне, акадэмічная свабода. Унівэрсытэты цалкам падкантрольныя ідэалягічнаму аддзелу і спэцслужбам », — падкрэсьліваюць у арганізацыі.

«Моладзь БНФ» «рашуча асуджае» выключэньне Ганны Сьмілевіч і выпадкі палітычнага ціску на студэнтаў. Арганізацыя патрабуе ад БДУ спыніць яе выключэньне з Інстытута журналістыкі, аднавіць намесьніка старшыні Партыі БНФ Юрыя Лукашэвіча на гістарычным факультэце. Ад усіх беларускіх унівэрсытэтаў «Моладзь БНФ» патрабуе аднавіць на вучобе адлічаных раней за грамадзка-палітычную дзейнасьць студэнтаў і ніколі ў далейшым не ўжываць падобныя рэпрэсіі.

Актывісты «Моладзі БНФ» зьбіраюць подпісы за наданьне вуліцы імя Ларысы Геніюш
Актывісты «Моладзі БНФ» зьбіраюць подпісы за наданьне вуліцы імя Ларысы Геніюш

Таксама «Моладзь БНФ» заклікала міжнародных партнэраў беларускіх унівэрсытэтаў зьвярнуць увагу «на выпадкі парушэньня правоў студэнтаў і прыняць адпаведныя крокі, каб не дапускаць такіх адлічэньняў у будучыні».

Прычынай адлічэньня 18-гадовай Ганны Сьмілевіч з БДУ сталі запазычанасьці па здачы экзамэнаў зімовай сэсіі.

Дзяўчына была абраная кіраўніком «Моладзі БНФ» на зьезьдзе арганізацыі 24 сьнежня 2017 году.

Ваша меркаваньне

Паказаць камэнтары

XS
SM
MD
LG