18 студзеня — апошні дзень рэгістрацыі кандыдатаў у дэпутаты мясцовых саветаў Беларусі. І хоць выбарчым камісіям на гэтую працэдуру даецца 10 дзён, пераважная бальшыня пасяджэньняў заплянаваная на 17 і 18 студзеня.
Камісіі тлумачаць затрымку навагоднімі сьвятамі. Маўляў, яны чакаюць вынікаў праверкі дэклярацый аб маёмасьці і прыбытку патэнцыйных кандыдатаў.
Увечары 17 студзеня выбарчая камісія разгледзела дакумэнты кандыдатаў у дэпутаты Менскага гарадзкога савету па Заслаўскай выбарчай акрузе № 40. Тут балятуецца былая кандыдатка на прэзыдэнта Беларусі, адзін з лідэраў грамадзянскай кампаніі «Гавары праўду» Тацяна Караткевіч. Акрамя яе, дакумэнты на рэгістрацыю падалі яшчэ намесьніца дырэктара сярэдняй школы № 32 Валянціна Дакунова, супрацоўнік ААТ «Алсевал» Уладзімер Качура і дырэктар «Галерэі Канцэпт» Уладзімер Хейфец.
Тацяна Караткевіч сказала Свабодзе, што яе зарэгістравалі кандыдатам у дэпутаты Менгарсавету па Заслаўскай выбарчай акрузе № 40.
Ярмошына паабяцала Караткевіч «істотныя, а не касмэтычныя зьмены выбарчага заканадаўства»
А напярэдадні Тацяна Караткевіч сустракалася са старшынёй Цэнтральнай выбарчай камісіі Лідзіяй Ярмошынай.
Паводле спадарыні Караткевіч, абмяркоўваліся дзьве тэмы: вынікі першага этапу мясцовых выбараў і неабходнасьць зьменаў выбарчага заканадаўства.
«Я прывяла такі прыклад. „Гавары праўду“ вылучала ў склад выбарчых камісій некалькі дзясяткаў чалавек. А ўключылі толькі аднаго. Мы бачылі, як мясцовая вэртыкаль проста блякуе зьяўленьне альтэрнатывы. Сёлета ўлады вельмі часта тлумачылі дэмакратычным прэтэндэнтам неўключэньне іх у выбарчыя камісіі адсутнасьцю досьведу такой працы. Таму я прапанавала старшыні ЦВК надалей зрабіць абавязковай норму абнаўленьня складу камісій», — сказала Тацяна Караткевіч Свабодзе.
З гэтага размова перайшла і на магчымыя зьмены выбарчага заканадаўства, якіх так даўно чакаюць.
«Спадарыня Ярмошына сказала мне, што зьмены рыхтуюцца. І, магчыма, нават больш глябальныя, чым касмэтычныя», — сказала Караткевіч.
