Лінкі ўнівэрсальнага доступу

Француская кампанія адклікае дзіцячае харчаваньне з 83 краінаў з прычыны сальманэлы


Ілюстрацыйнае фота.

Больш за 12 мільёнаў упаковак сухога малака для дзіцячага харчаваньня канфіскоўваюцца з продажу ў 83 краінах у сувязі з заражэньнем сальманэлай на прадпрыемстве францускай кампаніі Lactalis.

Кіраўнік кампаніі пацьвердзіў маштабы заражэньня ў заяве, апублікаванай у францускіх сродках інфармацыі, паведамляе BBC.

Бактэрыя сальманэлы была выяўленая на малочным заводзе кампаніі ў сьнежні мінулага году. Кампанія неадкладна пачала прыбіраць прадукцыю з продажу.

У дачыненьні да фірмы ўжо падалі некалькі судовых пазоваў бацькі дзяцей, якія, як сьцьвярджаецца, адчулі сябе дрэнна пасьля спажываньня прадуктаў кампаніі.

Група кампаній Lactalis — адна з найбуйнейшых у сьвеце вытворцаў малочнай прадукцыі, з аб’ёмам продажаў 17 млрд эўра ў год.

Распараджэньня аб адклiканьнi прадукцыі з продажу былі выпушчаныя кампаніяй ужо тройчы; яны тычацца шэрагу прадуктаў, якія выходзяць пад рознымі назвамі. Гаворка ідзе пра гандлёвыя маркі Picot, Milumel і Taranis.

Сальманэла выклікае вострыя страўнікава-кішачныя расстройства і абязводжваньне. Яна можа ўяўляць небясьпеку для жыцьця, асабліва ў выпадку заражэньня немаўлятак.

Сальманэла
Сальманэла

35 выпадкаў заражэньня зафіксаваныя ў Францыі, яшчэ адзін — у Гішпаніі. У дачыненьні да яшчэ аднаго эпізоду ў Грэцыі вядзецца расьсьледаваньне.

У інтэрвію, апублікаваным у францускай газэце Journal du Dimanche, кіраўнік Lactalis Эмануэль Бесньё адкінуў абвінавачваньні ў тым, што яго кампанія спрабавала схаваць факты заражэньня сальманэлай на адным са сваіх прадпрыемстваў.

Ён абяцаў садзейнічаць афіцыйнаму расьсьледаваньню, а таксама паабяцаў, што ўсім пацярпелым будзе выплачана кампэнсацыя.

У заяве кампаніі гаворыцца, што заражэньне было выклікана рамонтнымі работамі на малочным заводзе Celia у камуне Краон на паўночным захадзе Францыі.

Бэльгійская малочная карпарацыя купіла 69% акцыяў «Ляхавічка»

Летась у лютым Бельгійская B.S.A. International S.A. набыла кантрольны пакет акцый СААТ «Ляхавіцкі малочны завод». Паводле інфармацыі Bloomberg, B.S.A. International S.A. зьяўляецца мацярынскай кампаніяй аднаго з найбуйнейшых вытворцаў малака — францускай Groupe Lactalis S.A., якая, у сваю чаргу, ёсьць трэцім паводле велічыні перапрацоўшчыкам малака ў сьвеце пасьля амэрыканскай Dairy Farmers of America і навазэляндскай Fonterra.

Ляхавіцкі малочны завод зьяўляецца невялікім, але прыбытковым перапрацоўчым прадпрыемствам. Кампанія ўваходзіць у дваццатку самых прыбытковых кампаніяў галіны. Прадукцыя кампаніі прадаецца пад брэндам «Ляхавічок».

Журналісты Свабоды спрабуюць высьветліць, ці ёсьць Беларусь сярод 83 краінаў, адкуль француская кампанія адклікае дзіцячае харчаваньне.

XS
SM
MD
LG