Лінкі ўнівэрсальнага доступу

Украінскія палітыкі: Кіеў не прадае Крым за караблі


Украінскі карабель у анэксаваным Сэвастопалі ў сакавіку 2014 году.

Украінскія палітыкі і вайскоўцы выступілі з крытыкай прапановы прэзыдэнта Расеі Ўладзіміра Пуціна перадаць Украіне яе караблі і авіяцыйную тэхніку, захопленыя расейскімі войскамі пасьля анэксіі Крыму ў 2014 годзе.

«Украіна ня прыме ад Расеі свае караблі ў абмен на адмову ад паўвострава. Крым за караблі не прадаем, не здаем і не мяняем», — заявіла першы віцэ-спікер Вярхоўнай Рады Ірына Герашчанка. «Зьневажальнай падачкай» назваў заяву Пуціна лідэр забароненага ў Расеі Мэджліса крымска-татарскага народу Рэфат Чубараў, паклікаўшы Кіеў адмовіцца ад прапановы расейскага прэзыдэнта.

У сваю чаргу былы камандуючы Ваенна-марскімі сіламі Ўкраіны Сяргей Гайдук, камэнтуючы словы Пуціна, адзначыў, што сумняваецца ў перадачы расейцамі спраўных караблёў і вайсковай тэхнікі. У якасьці прыкладу ён прывёў разьдзел савецкага Чарнаморскага флёту ў 90-я гады, заявіўшы, што караблі, якія Масква перадавала Кіеву, знаходзіліся ў «жудасным стане», а некаторыя вузлы былі наўмысна пашкоджаныя.

11 студзеня Ўладзімір Пуцін на сустрэчы з кіраўнікамі расейскіх СМІ заявіў, што Расея гатовая перадаць Украіне яе вайсковыя караблі і авіятэхніку з Крыма. Пасьля расейскай анэксіі паўвострава там засталіся 11 баявых караблёў і катэраў, якія належаць ВМС Украіны, у тым ліку дэсантны карабель «Канстанцін Альшанскі», карвэт «Цярнопаль», марскі тральшчык «Чаркасы», 6 дапаможных вадаплаваў і больш за 2000 адзінак тэхнікі.

Ваша меркаваньне

Паказаць камэнтары

XS
SM
MD
LG