Грыгорый Яўлінскі афіцыйна вылучаны на прэзыдэнцкія выбары ў Расеі ад партыі «Яблоко». Пра гэта было абвешчана на зьезьдзе партыі 22 сьнежня.
18 сьнежня ў Расеі афіцыйна пачалася выбарчая кампанія. Акрамя Яўлінскага на пасаду прэзыдэнта маюць намер балятавацца дзеючы кіраўнік дзяржавы Ўладзімір Пуцін, упаўнаважаны па правах прадпрымальнікаў Барыс Цітоў, тэлевядучая Ксенія Сабчак, бізнэсмэн Сяргей Палонскі і апазыцыянэр Аляксей Навальны.
У пятніцу Цэнтральная выбарчая камісія Расеі таксама афіцыйна зарэгістравала ў якасьці кандыдата ў прэзыдэнты лідэра ЛДПР Уладзіміра Жырыноўскага.
Выбары прэзыдэнта Расеі прызначаныя на 18 сакавіка 2018 года.
