Лінкі ўнівэрсальнага доступу

Рэдактара барысаўскай газэты аштрафавалі за інфармацыю пра Марш абураных беларусаў


Суд Барысаўскага раёну аштрафаваў на 15 базавых велічыняў (345 рублёў) рэдактара газэты «Борисовские новости» Анатоля Букаса за заклік да ўдзелу ў несанкцыянаванай акцыі, паведамляе Беларуская асацыяцыя журналістаў.

Падставай для адміністрацыйнай справы стала інфармацыя, зьмешчаная ў артыкуле «Рассерженные люди выйдут на площадь» (№ 40 (1324) ад 4 кастрычніка 2017 году).

«Відэаролік заканчваецца заклікам паўдзельнічаць у чарговым Маршы абураных беларусаў 2.0, які плянуюць правесьці лідэры Беларускага нацыянальнага кангрэсу 21 кастрычніка а 14-й гадзіне на Кастрычніцкай плошчы ў Менску», — цытавалася публікацыя газэты ў ранейшым папярэджаньні Мінінфармацыі.

Кампанія «Букас мэдыя-цэнтар» была абвінавачаная ў парушэньні артыкула 38 закону «Аб сродках масавай інфармацыі» — «Інфармацыя, распаўсюд якой у сродках масавай інфармацыі забаронены». Анатоль Букас віны не прызнаў і мае намер абскардзіць вырак у абласным судзе.

20 лістапада Міністэрства інфармацыі вынесла газэце пісьмовае папярэджаньне, падпісанае кіраўніком ведамства Аляксандрам Карлюкевічам. Ён запатрабаваў выправіць парушэньні цягам васьмі дзён.

Ваша меркаваньне

Паказаць камэнтары

XS
SM
MD
LG