Лінкі ўнівэрсальнага доступу

Лукашэнка патрабаваў ад яго $100 мільёнаў кампэнсацыі, а Францыя падазрае ў нявыплаце паўмільярда падаткаў


Расейскага сэнатара Сулеймана Керымава падазраюць ва ўхіленьне ад выплаты падаткаў на суму памерам больш за 400 мільёнаў эўра. Пра гэта са спасылкай на крыніцу, блізкую да сьледзтва, паведаміла AFP.

Паводле суразмоўцы агенцтва, Керымаў змог пазьбегнуць падаткаў дзякуючы паніжанаму кошту нерухомасьці. Яшчэ каля 40 мільёнаў эўра за розныя паслугі былі выплачаныя сэнатарам наяўнымі, зьнятымі з рахункаў у Швайцарыі і Манака, і не задэкляраванымі, сьцьвярджае крыніца AFP.

Як стала вядома ў чацьвер, 30 лістапада, у рамках расьсьледаваньня справы Керымава, была затрыманая 46-гадовая агентка па нерухомасьці. Імя затрыманай не называецца. Ёй таксама прад’яўленыя абвінавачваньні ў адмываньні грашовых сродкаў і махлярстве. Пра гэта AFP паведамілі ў пракуратуры Ніцы.

Чалец расейскага Савету Фэдэрацыі ад Дагестана Сулейман Керымаў быў затрыманы ў аэрапорце Ніцы 20 лістапада. Яго пакінулі пад вартай на 48 гадзін, а затым прад’явілі абвінавачваньні ў адмываньні грошай і нявыплаце падаткаў. Па вэрсіі сьледзтва, вілы на мысе Анціб былі набытыя Керымавым праз падстаўных асоб.

У 2013 годзе Керымаў стаў галоўным героем калійнай вайны паміж Беларусьсю і Расеяй. Сьледчы камітэт Беларусі абвінаваціў мільярдэра паводле крымінальнай справы ў злоўжываньні паўнамоцтвамі ў дачыненьні да службовых асобаў ЗАТ «Беларуская калійная кампанія».

Генэральнага дырэктара «Уралкалію» Вячаслава Баўмгертнэра арыштавалі адразу пасьля сустрэчы з тагачасным прэм'ер-міністрам Міхаілам Мясьніковічам. У Беларусь тады, дарэчы, запрашалі і самога ўласьніка кампаніі. Лукашэнка патрабаваў кампэнсаваць страты ў памеры больш чым 100 млн. даляраў.

У выніку, Керымаў прадаў сваю долю ва «Ўралкаліі», «Беларуськалій» пачаў наладжваць зь ім стасункі, Баўмгертнэра адвезьлі ў Расею, патрымалі крыху ў СІЗА, перавялі пад хатні арышт і ўрэшце спынілі крымінальную справу. Страты, пра якія казаў Лукашэнка, так і не сплацілі.

Ваша меркаваньне

Паказаць камэнтары

XS
SM
MD
LG