Лінкі ўнівэрсальнага доступу

Палітвязень Паліенка асьцерагаецца, што яму павялічаць турэмны тэрмін


Зьміцер Паліенка

Актывіст Зьміцер Паліенка, які адбывае 1,5 года зьняволеньня ў Бабруйскай калёніі, не выключае, што да яго будзе ўжыты 411 артыкул Крымінальнага кодэксу. Гэты артыкул дазваляе ў вязьніцы павялічыць тэрмін пакараньня яшчэ на год. Пра такую небясьпеку Зьміцер Паліенка сказаў свайму бацьку на нядаўнім спатканьні ў калёніі.

Аляксандр Паліенка сказаў карэспандэнту Свабоды, што сына ўжо тройчы каралі карцэрам, у тым ліку на 10 сутак:

«Прычым яўна за нейкую драбязу. Быццам курыў ня ў тым месцы, ці што яшчэ прыдумляюць. Вось цяпер пасьля спатканьня зноў адправяць у ШЫЗА. Там сядзіць у адзіночцы, у досыць халоднай камэры».

Зьміцер не выключае, што зь яго хочуць зрабіць злоснага парушальніка, каб мець магчымасьць засудзіць паводле 411-га артыкула — за невыкананьне законных патрабаваньняў адміністрацыі. «А гэта яшчэ год», — падсумоўвае Аляксандар Паліенка.

Паводле бацькі актывіста, Зьміцер у турме рамантуе швачнае абсталяваньне:

«Толькі кажа, што зусім мала плацяць — за месячны заробак можа набыць усяго 4–5 пачак цыгарэт».

Зьміцер Паліенка (трэці зьлева) сярод абаронцаў Курапатаў 14 сакавіка 2017 году
Зьміцер Паліенка (трэці зьлева) сярод абаронцаў Курапатаў 14 сакавіка 2017 году

Amnesty International прызнала Зьмітра Паліенку вязьнем сумленьня

Летась у кастрычніку актывіст Зьміцер Паліенка быў асуджаны на 2 гады з адтэрміноўкай паводле абвінавачаньня ў гвалтоўных дзеяньнях адносна супрацоўніка міліцыі. Паводле суду, актывіст парваў супрацоўніку ДАІ вопратку і штурхануў яго падчас акцыі раварыстаў «Крытычная маса», якая адбылася ў Менску ў траўні 2016 году.

Тады падчас сьледзтва Зьміцер Паліенка адбыў у ізалятары паўгода. Гэты час яму залічылі, калі сёлета ў красавіку яго ўсё ж такі адправілі ў калёнію — за тое, што не выконваў умоваў адтэрміноўкі пакараньня (удзельнічаў у несанкцыянаваных акцыях пратэсту). Цяпер на волю Зьміцер Паліенка выйдзе ў кастрычніку 2018 году — гэта калі яму не павялічаць тэрмін паводле 411 артыкула.

Праваабаронцы лічаць Зьмітра Паліенку палітвязьнем і патрабуюць перагляду ягонай крымінальнай справы. Міжнародная арганізацыя Amnesty International прызнала Зьмітра Паліенку вязьнем сумленьня.

У Беларусі 411 артыкул Крымінальнага кодэксу, паводле якога караюць дадатковым зьняволеньнем ужо асуджаных злачынцаў, выкарыстоўваецца і адносна вязьняў, якіх праваабаронцы прызнавалі палітычнымі. Дадатковыя тэрміны давялося адбыць Зьмітру Дашкевічу і Мікалаю Дзядку. Сёлета ў сакавіку праз суд паводле 411 артыкула прайшоў і праваабаронца Андрэй Бандарэнка. Для яго працэс завяршыўся пасьпяхова, і ён выйшаў на волю ў раней прызначаны тэрмін.

Што, акрамя хакейных клюшак, вырабляюць у калёніях і за які заробак

Ваша меркаваньне

Паказаць камэнтары

XS
SM
MD
LG