Пра гэта паведаміў пракурор Ніцы Жан-Мішэль Прэтр, перадае Reuters.
Пакуль у дачыненні да Керымава праводзіцца расьсьледаваньне, суд прыняў рашэньне адпусьціць яго з-пад варты пад заклад у 5 мільёнаў эўра. Да канца сьледзтва падазраванаму забаронена пакідаць межы дэпартамэнту Прыморскіх Альпаў і мець зносіны зь людзьмі, сьпіс якіх складзены органамі юстыцыі.
Акрамя таго, ён павінен здаць расейскі пашпарт і кожны тыдзень прыходзіць у паліцыю да завяршэньня расьсьледаваньня.
Керымава затрымалі 20 лістапада ў аэрапорце Ніцы па падазрэньні ў адмываньні дзясяткаў мільёнаў эўра і махлярстве з падаткамі. Як піша Le Figaro, Керымаў стварыў сыстэму пасярэднікаў для набыцьця нерухомасьці на Блакітным беразе, папулярным сярод расейскіх алігархаў.
Крыніцы выданьня сьцвярджаюць, што цэны на нерухомасьць знарок заніжаліся дзеля маніпуляцыі з падаткамі. Керымава падазраюць у аплаце гатоўкай за набытыя аб’екты, хоць ягонае імя ў дакумэнтах і не фігуравала.
У Міністэрстве замежных спраў Расеі дзеянні францускіх уладаў назвалі незаконнымі, паколькі Керымаў зьяўляецца афіцыйнай асобай і валодае дыпляматычным імунітэтам. Крэмль паабяцаў прыкласьці ўсе намаганьні для абароны «законных інтарэсаў» свайго грамадзяніна.
