Журы прэміі імя Натальлі Арсеньневай вызначылася з кароткім сьпісам прэтэндэнтаў на ўзнагароду за найлепшую кнігу паэзіі.
Першая прэмія будзе ўручаная за кнігу паэзіі, напісаную на беларускай мове і выдадзеную ў 2016 годзе.
У сьпіс увайшлі:
- Віктар Жыбуль «Дзяцел і дупло»
- Ганна Комар «Страх вышыні»
- Наста Кудасава «Маё невымаўля»
- Уладзімер Някляеў «Толькі вершы»
- Сяргей Прылуцкі «Патрыятызм для чайнікаў»
- Міхась Скобла «Камізэлька для месяца»
- Андрэй Хадановіч «Цягнік Чыкага —Токіё»
- Юлія Цімафеева «Цырк»
Пераможца будзе названы на цырымоніі ўзнагароджаньня, якая адбудзецца ў сьнежні.
У склад журы прэміі сёлета ўвайшлі вядомыя літаратары, перакладчыкі і літаратуразнаўцы Ірына Багдановіч, Лявон Баршчэўскі, Уладзімер Глазаў, Вальжына Морт і Ціхан Чарнякевіч.
Прэмія за найлепшую паэтычную кнігу заснаваная ў гонар беларускай паэткі Натальлі Арсеньневай, аўтаркі верша «Малітва» («Магутны Божа»), які успрымаецца часткай беларусаў як неафіцыйны гімн краіны. Пасьля вайны Арсеньнева апынулася ў эміграцыі, дзе працягвала займацца беларускай справай, удзельнічала ў культурнай і асьветніцкай дзейнасьці.
Літаратурная прэмія імя Натальлі Арсеньневай заснаваная Саюзам беларускіх пісьменьнікаў, Беларускім ПЭН-цэнтра і згуртаваньнем беларусаў сьвету «Бацькаўшчына» пры спрыяньні Фонду культуры і адукацыі Орса-Рамана і Харытатыўнага фонду Згуртаваньня беларусаў Вялікай Брытаніі.
Плянуецца, што прэмія стане штогадовай.