Раней навіннае агенцтва Reuters са спасылкай на крыніцы, блізкія да перамоваў, паведаміла, што Мугабэ згадзіўся пайсьці ў адстаўку.
У нядзелю раніцай ён быў пазбаўлены пасады лідэра кіруючай партыі Афрыканскі нацыянальны саюз Зымбабвэ-Патрыятычны фронт (ZANU-PF). ZANU-PF выставіла 93-гадоваму дыктатару ультыматум: альбо адстаўка на працягу сутак, альбо імпічмэнт.
Адразу пасьля вечаровага тэлезвароту лідэр кампаніі за адхіленьне Мугабэ ад улады вайсковы вэтэран Крыс Муцвангва заявіў, што ў сераду людзі выйдуць на вуліцы сталіцы Зымбабвэ Харарэ з пратэстам і патрабаваньнем адстаўкі дуктатара.
Вайсковы пераварот, хатні арышт, масавыя пратэсты
Незадоўга да гэтага ў Зымбабвэ быў учынены вайсковы пераварот, а Мугабэ адправілі пад хатні арышт. Путчысты абвясьцілі сваёй мэтай барацьбу з «злачынцамі з акружэньня прэзыдэнта», якія прывялі краіну да сацыяльнага і эканамічнага крызісу.
Пасьля захопу ўлады ў краіне жонка прэзыдэнта Зымбабвэ Грэйс Мугабэ, вядомая таксама пад імем «Гучы Грэйс» за сваю любоў да раскошных пакупак, уцякла ў Намібію. Агенцтва ANA са спасылкай на крыніцы зазначала, што яе адпусьцілі з умовай, што Мугабэ сыдзе ў адстаўку.
Зымбабвійцы выйшлі на вуліцы падтрымаць адхіленьне Мугабэ ад улады
Напярэдадні тысячы чалавек выйшлі на вуліцы сталіцы Зымбабвэ, гораду Харарэ, каб вітаць армію, якая вось ужо некалькі дзён утрымлівае пад хатнім арыштам прэзыдэнта Мугабэ. Яны запатрабавалі адстаўкі 93-гадовага прэзыдэнта, які кіраваў краінай 37 гадоў. «Ад імя ўсіх грамадзян мы кажам нашай арміі:» Вялікі вам дзякуй за мірнае ўмяшаньне", — цытуе Бі-Бі-Сі словы аднаго з пратэстоўцаў.
15 лістапада ўзброеныя сілы Зымбабвэ ўзялі пад кантроль сталіцу, горад Харарэ і цяпер краінай кіруе раней адпраўлены ў адстаўку віцэ-прэзыдэнт Эмэрсан Мнангагва. У канцы мінулага тыдня вайскоўцы захапілі тэлецэнтар і рэзыдэнцыю прэзыдэнта Зымбабвэ. Яны ня жадаюць прызнаваць, што тое, што адбываецца ў краіне зьяўляецца вайсковым пераваротам.
93-гадовы Робэрт Мугабэ — адзіны кіраўнік, якога краіна ведала ад моманту здабыцьця незалежнасьці ў 1980 годзе. У наступным годзе ён зьбіраўся пераабірацца на новы тэрмін. У гэтым выпадку Мугабэ заставаўся б ва ўладзе да 99 гадоў, што цалкам адпавядае яго плянам дажыць да 100-гадовага юбілею.
