Паліцыя не знайшла парушэньняў у шыльдзе. Аднак рашэньне аб адмове пачаць адміністрацыйную справу аспрэчыла пракуратура, паведамляе расейскае выданьне «Коммерсантъ». Сам Сьцерлігаў сьцьвярджае, што закрыў краму «праз несур’ёзнае стаўленьне партнэраў», перадае партал Ura.ru.
1 лістапада стала вядома, што паліцыя запатрабавала ад Сьцерлігава прыбраць гамафобную таблічку зь вітрыны адной з крамаў «Хлеб і соль» у Маскве. Паліцыянты патлумачылі сваё патрабаваньне шматлікімі скаргамі грамадзян. Сьцерлігаў пасля гэтага заявіў пра намер прадаць усе свае маскоўскія крамы. «Моцна душыць пракуратура», — сказаў ён.
Раней Герман Сьцерлігаў паведаміў падпісчыкам ў сацыяльнай сетцы «Вконтакте» пра звальненьне прадавачкі сваёй фэрмэрскай крамы ў Кіраве, якая нібыта пачаставала кліента-гея квасам: «Усіх наступных прадавачак, якія падтрымліваюць гэтую брудную навалач, будзем выкідваць на дарогу штурхялём пад зад!» — напісаў ён на сваёй старонцы.
Аказалася, што звальненьне прадавачкі стала адным з наступстваў кампаніі, якую разгарнулі супраць Сьцерлігава ЛГБТ-актывісты. Яны хадзілі па яго «фэрмэрскіх крамах», паведамлялі пра сваю нетрадыцыйную сэксуальную арыентацыю і правяралі, ці пагодзяцца іх пасьля гэтага абслужыць, здымаючы дыялёгі з прадаўцамі схаванай камэрай.
Да апошніх дзён адзіным пасьпяховым прыкладам барацьбы са скандальнымі крамамі была гісторыя з Санкт-Пецярбургу. У чэрвені сёлета Вера Ўрубель, жыхарка дома на Лігаўскім праспэкце, у якім зьявілася крама Сьцерлігава, дамаглася яго закрыцьця — замест цэнтру гораду сваю новую краму бізнэсоўцу давялося адкрываць на ўскраіне.
***
50-гадовы Герман Сьцерлігаў — расейскі бізнэсовец, вядомы сваімі радыкальна праваслаўнымі поглядамі. Быў адным з сузаснавальнікаў першай у Расеі таварнай біржы на пачатку 1990-х, адзін зь першых расейскіх мільянэраў. Вылучаўся ў прэзыдэнты Расеі на выбарах 2004 году, аднак зарэгістраваны ня быў. У тым жа годзе пакінуў бізнэс і паехаў разам зь сям’ёй у вёску. Праз чатыры гады зноў вярнуўся да камэрцыйнай дзейнасьці.
Прапагандуе ідэі праваслаўнага хрысьціянства, хоць да ніводнай з існуючых цэркваў сябе не залічвае. Выступае за аб’яднаньне Расеі, Украіны і Беларусі. У 2014 годзе казаў, што хоча атрымаць пашпарт «ЛНР».
