Лінкі ўнівэрсальнага доступу

У Данбасе новае абвастрэньне: сэпаратысты абстралялі ўкраінскія пазыцыі з «Градаў»


Карта баявога становішча паводле стану на 5 лістапада 2017 году.

На ўсходзе Ўкраіны ў нядзелю абвастрылася сытуацыя ў зоне канфлікту. Агенцтва «Укрінфарм» са спасылкай на прэсавы цэнтар штабу антытэрарыстычнай апэрацыі паведамляе пра ўзмацненьне абстрэлаў з боку прарасейскіх сэпаратыстаў.

Агенцтва таксама адзначае, што абстрэлы пазыцый ўкраінскай арміі вяліся з прымяненьнем цяжкага ўзбраеньня, якое не павінна знаходзіцца на лініі разьмежаваньня паводле Менскіх пагадненьняў.

У паведамленьні, у прыватнасьці, гаворыцца, што сэпаратысты двойчы ўжывалі рэактыўныя сыстэмы залпавага агню, мінамёты розных калібраў, 122-мілімэтровую артылерыю. Два ўкраінскія вайскоўцы параненыя. Сьцьвярджаецца, што сэпаратысты, якіх падтрымлівае Расея, у прыватнасьці выпусьцілі больш за 100 снарадаў з рэактыўных сыстэм залпавага агню па ўкраінскіх апорных пунктах паблізу Аўдзееўкі і Опытнага.

У сваю чаргу сэпаратысты і сайты так званай «ДНР» паведамляюць аб абстрэлах жылых раёнаў Данецка з рэактыўных сыстэм залпавага агню. Сьцьвярджаецца, што пашкоджаньні атрымалі ня менш за 10 дамоў.

У прэс-цэнтры ўкраінскай апэрацыі заявілі, што ўкраінская армія «не вядзе абстрэлаў жылых кварталаў».

Ваша меркаваньне

Паказаць камэнтары

XS
SM
MD
LG