Лінкі ўнівэрсальнага доступу

24-гадовы француз ужо месяц сядзіць у гомельскім СІЗА за патрон у кішэні


Затрыманы пры выезьдзе зь Беларусі ва Ўкраіну, Жалян Віё (Jolan Viaud)​ меў у кішэні патрон, які яму падараваў у Варшаве польскі сябар у якасьці сувэніра. Суд над затрыманым мае адбыцца празь некалькі тыдняў. Яму пагражае ад трох да сямі гадоў турмы за незадэкляраваны правоз боепрыпасаў празь мяжу.

Пра гэта паведамляецца на сайце паўднёвафранцускай газэты La Depèche.

Малады француз раней сёлета выправіўся ў падарожжа па Эўропе. 21 верасьня, калі ён выяжджаў зь Беларусі ва Ўкраіну, ён быў затрыманы на мяжы. Прычынай стаў патрон, які ён трымаў у кішэні як сувэнір, што падараваў яму ягоны сябар Павэл, у якога падарожнік спыняўся ў Варшаве. Пра гэта затрыманы паведаміў у лісьце, які яму ўдалося пераслаць сям’i ў Францыю праз тры тыдні пасьля затрыманьня.

Жалян Віё расказвае што, не чакаючы пытаньняў мытніка, ён паказаў патрон сам, каб даведацца, ці яго можна правезьці. Аднак мытнікі гаварылі толькі па-расейску, і таму «дыялёг быў немагчымы». «Калі б я ведаў, што гэта забаронена, я б яго ня ўзяў або лепш бы схаваў», — піша Жалян Віё ў лісьце.

Гомескі сьледчы ізалятар
Гомескі сьледчы ізалятар

Віё быў затрыманы і зьмешчаны ў СІЗА. Там ён сутыкнуўся зь «нялюдзкімі ўмовамі, ускладненымі беларускім кліматам». Спачатку яго мучылі холадам, не даючы коўдры і цёплага адзеньня, яму забаранілі кантакт зь сям’ёй, пасьля прымусілі згаліць бараду. Афіцыйна прызначаная адвакатка не гаворыць ні па-француску, ні па-ангельску. Урэшце, у мінулую суботу, больш чым празь месяц пасьля затрыманьня, яму дазваляюць напісаць сям’і.

Сям’я Жаляна Віё распачала кампанію ў сацыяльных сетках за ягонае вызваленьне і зьбірае грошы на новага адваката.

Дзяжурны Гомельскага сьледчага ізалятара пацьвердзіў старшыні гарадзкой арганізацыі Беларускай асацыяцыі журналістаў Анатолю Гатоўчыцу, што затрыманы пры выезьдзе зь Беларусі ва Ўкраіну Жалян Віё сапраўды знаходзіцца у СІЗА пад вартаю. Ніякай іншай інфармацыі дзяжурны ня даў.

Паводле словаў Гатоўчыца, гомельская арганізацыі БАЖ зьбірае харчовую перадачу для французкага калегі.

Ваша меркаваньне

Паказаць камэнтары

XS
SM
MD
LG