Паводле наяўных дадзеных, найбольшая колькасьць галасоў — больш за 30 працэнтаў, як і меркавалася, набіраюць правацэнтрысты з руху ANO ( «Так»). Яго ўзначальвае мільярдэр і былы міністар фінансаў Чэхіі Андрэй Бабіш. Назіральнікі дапускаюць, што менавіта Бабіш можа заняць месца прэм’ер-міністра, нягледзячы на абвінавачваньні ў карупцыі і злоўжываньні фондамі ЭЗ. Бабіш ня раз крытыкаваў ЭЗ, у тым ліку эўрапейскую сыстэму квот на прыём уцекачоў і патрабаваньні, зьвязаныя з пераходам на эўра.
Другое месца з 12 адсоткамі галасоў займае партыя «Свабода і прамая дэмакратыя» чэскага нацыяналіста Томіа Акамура. За камуністаў, Грамадзянскую дэмакратычную партыю і Пірацкую партыю прагаласавала прыкладна па 10 працэнтаў выбаршчыкаў. Усяго каля 8 працэнтаў галасоў атрымала вядучая партыя цяперашняй кіруючай кааліцыі — сацыял-дэмакраты.
Па прагнозах назіральнікаў, у парлямэнт можа прайсьці рэкордная колькасьць партый — да дзевяці, у тым ліку правыя і левыя эўраскептыкі.