Лінкі ўнівэрсальнага доступу

Мінюст РФ папярэдзіў Радыё Свабода аб магчымых абмежаваньнях дзейнасьці


Штаб-кватэра Радыё Свабодная Эўропа/Радыё Свабода ў Празе

Мэдыякарпарацыя Радыё Свабодная Эўропа / Радыё Свабода і яе маскоўскае прадстаўніцтва атрымалі афіцыйны ліст міністэрства юстыцыі Расейскай Фэдэрацыі. У тэксьце, падпісаным дырэктарам дэпартамэнту па справах некамэрцыйных арганізацыяў Уладзімерам Цітовым, зьмяшчаецца паведамленьне аб «магчымасьці ўстанаўленьня абмежаваньняў» для журналістаў карпарацыі.

Аналягічныя лісты атрымалі іншыя праекты мэдыякарпарацыі — сайт «Крым. Реалии» і тэлеканал «Настоящее время». У заяве ў адказ Нэнад Пейч, віцэ-прэзыдэнта і галоўнага рэдактара РСЕ / РС, падкрэсьліваецца, што тэлеканал «Настоящее время», Радыё Свабода і сайт «Крым. Реалии» зьяўляюцца журналісцкімі, а не палітычнымі арганізацыямі. «Мы верым, што будзем мець магчымасьць і надалей працягваць выкананьне нашай місіі» — заявіў Пейч.

У лісьце міністэрства юстыцыі, у прыватнасьці, гаворыцца пра тое, што расейскім законам «Аб сродках масавай інфармацыі» прадугледжаная магчымасьць "устанаўленьня абмежаваньняў для карэспандэнтаў сродкаў масавай інфармацыі тых дзяржаваў, у якіх маюцца спэцыяльныя абмежаваньні для ажыцьцяўленьня прафэсійнай дзейнасьці журналістаў сродкаў масавай інфармацыі, зарэгістраваных у Расейскай Фэдэрацыі".

"Па дадзеных расейскіх кампэтэнтных органаў дзейнасьць вашай арганізацыі падпадае пад прыкметы, устаноўленыя ў артыкуле 2 фэдэральнага закону“ Аб некамэрцыйных арганізацыях» для арганізацыяў — замежных агентаў. Да дзейнасьці вашай арганізацыі могуць быць ужытыя абмежаваньні, прадугледжаных заканадаўствам Расейскай Фэдэрацыі" — паведамляецца ў лісьце.

У апошні час неаднаразова зьяўлялася інфармацыя пра тое, што расейскія ўлады гатовыя перагледзець умовы працы некаторых замежных сродкаў масавай інфармацыі на тэрыторыі Расеі. Афіцыйны прадстаўнік МЗС РФ Марыя Захарава заявіла, што яе ведамства плянуе прыняць меры ў адказ у дачыненьні да амэрыканскіх СМІ, якія працуюць у Расеі, у выпадку «працягу ціску на расейскі тэлеканал RT ў ЗША».

6 кастрычніка Крэмль папярэдзіў, што дзейнасьць некаторых амэрыканскіх СМІ, якія працуюць на тэрыторыі Расеі, можа быць абмежаваная " у адказ на ціск, які аказваецца Вашынгтонам на прадстаўніцтва расейскіх СМІ ў ЗША". Як заявіў прэсавы сакратар прэзыдэнта Расеі Дзьмітры Пяскоў, у выпадку працягу ціску і парушэньня права расейскіх мэдыя на бесперашкодную працу ён не можа выключыць прыняцьця мераў у адказ на аснове прынцыпу «узаемнасьці».

Праваахоўныя органы ЗША ў апошні час надаюць падвышаную ўвагу прынамсі двум расейскім СМІ — тэлеканалу RT і сайту навінаў Sputnik. Тэлеканал RT, які фінансуецца расейскім урадам, быў абвінавачаны амэрыканскімі спэцслужбамі ў спробах уплыву на вынік леташніх прэзыдэнцкіх выбараў у ЗША. У Вашынгтоне ўсё часьцей чуюцца заклікі да рэгістрацыі RT і Sputnik па законе 79-гадовай даўніны, які першапачаткова быў прыняты для процідзеяньня нацысцкай прапагандзе. За савецкім часам некаторыя расейскамоўныя СМІ, уключаючы газэту «Правда» і агенцтва ТАСС, былі зарэгістраваныя ў ЗША ў якасьці замежных агентаў.

Ваша меркаваньне

Паказаць камэнтары

XS
SM
MD
LG