Дырэктар Фэдэральнай службы бясьпекі Расеі Аляксандр Бортнікаў заявіў, што ілжывыя званкі аб мінаваньні ў расейскіх гарадах рабілі чацьвёра расейцаў, якія знаходзяцца за мяжой. Паводле яго, у іх ёсьць памагатыя ў Расеі, перадае «Інтэрфакс».
Бортнікаў удакладніў, што зламысьнікі выкарысталі, як ён выказаўся, «IР-тэхналёгію», каб схаваць сваё знаходжаньне. У якіх краінах яны знаходзяцца, дырэктар ФСБ не паведаміў.
Ананімныя паведамленьні пра пагрозу выбухаў паступаюць у праваахоўныя органы Расеі ад 10 верасьня. За гэты час былі эвакуяваныя сотні тысяч людзей у пяцідзесяці рэгіёнах краіны. Ніводнае з паведамленьняў аб мінаваньні пакуль не пацьвердзілася.
Званкі аб мінаваньні нанесьлі істотную эканамічную шкоду. Паводле папярэдніх зьвестак, яна ацэньваецца больш як у 300 мільёнаў рублёў.
