«На жаль, нам ня вельмі шмат вядома пра гэтую гісторыю. Нам вядома толькі тое, што беларускія памежнікі пацьвердзілі заезд на тэрыторыю Рэспублікі Беларусь Паўла, і тое, што адтуль ён не выяжджаў», — прыводзіць словы Грыцака агенцтва УНІАН.
«Мы толькі можам здагадвацца, і мы цяпер ловім фрагмэнтарную інфармацыю з нагоды таго, дзе ён можа знаходзіцца, але і вы, і мы разумеем, што, хутчэй за ўсё, ён у руках ФСБ у Расейскай Фэдэрацыі», — сказаў Грыцак.
Як паведамлялася раней, 28 жніўня чалец грамадзкага савета Дзяржпагранслужбы Ўкраіны Ігар Грыб заявіў аб зьнікненьні яго 19-гадовага сына Паўла Грыба. Ён паведаміў, што 24 жніўня сын паехаў у Гомель на сустрэчу зь дзяўчынай, зь якой пазнаёміўся і меў зносіны толькі ў сацыяльных сетках. Дзяўчына, паводле слоў сына, павінна была прыехаць на сустрэчу з Расеі.
Павел Грыб мусіў вярнуцца ў той жа дзень. Калі гэтага не адбылося, бацька паехаў на пошукі ў Гомель, дзе высьветліў, што яго сын знаходзіцца ў вышуку на падставе арт. 205 Крымінальнага кодэкса РФ (тэрарыстычны акт), а ініцыятарам вышуку зьяўляецца ФСБ РФ па Краснадарскім краі (горад Сочы).
Шэраг СМІ паведамілі, што Паўла Грыба перахапілі ў Беларусі і могуць утрымліваць у Краснадары, у мясцовым аддзяленьні ФСБ РФ.
