Архібіскуп Сімфэропальскі і Крымскі Клімэнт паведаміў парталу «Крым.Реалии» (праект Радыё Свабода), што з раніцы ня можа трапіць у храм сьвятых роўнаапостальных князёў Вольгі і Ўладзіміра. Паводле яго, людзі, якія ўварваліся ў будынак, паказваюць судовыя рашэньні аб высяленьні духоўнага цэнтра, якога ўжо больш за два гады няма ва ўпраўленьні дыяцэзіі.
Расейскія ўлады ў Крыму не камэнтуюць сытуацыю з храмам.
Пасьля анэксіі паўвострава значная часта храмаў Крымскай эпархіі Ўкраінскай праваслаўнай царквы Кіеўскага патрыярхату перайшла пад кантроль расейскіх уладаў. Большасьць праваслаўных храмаў і суполак Крыма і Севастопаля знаходзяцца ў падпарадкаваньні Маскоўскага патрыярхату.