Лінкі ўнівэрсальнага доступу

У Беларусі на сталай аснове працуе група ФСБ Расеі — былы намесьнік старшыні СБУ


Намесьнік старшыні Службы бясьпекі Ўкраіны (сакавік 2014 — чэрвень 2015) Віктар Ягун заяўляе, што ў Беларусі на сталай аснове працуе група Фэдэральнай службы бясьпекі РФ, якая можа мець дачыненьне да выкраданьня замежных грамадзян.

«У нас ёсьць інфармацыя пра тое, што ў Беларусі ёсьць група ФСБ у складзе ад 30 да 40 чалавек, якія на сталай аснове працуюць у Менску, у тым ліку там ёсьць і сілавая група. Калі трэба праводзіць затрыманьне, яны, як правіла, ня ставяць да ведама беларускіх калег і праводзяць гэтыя мерапрыемствы самі», — паведаміў Свабодзе Віктар Ягун.

Генэрал-маёр запасу СБУ дадаў, што Беларусь ды Расея аб’ядналі кампутарную базу дадзеных пра перасячэньне зьнешніх межаў Саюзнай дзяржавы.

«Калі я езьдзіў на перамовы ў Менск, неаднаразова назіраў за кампутарамі, на якіх працуюць службоўцы памежных войскаў Беларусі і бачыў там адпаведныя налепкі, што сьведчылі пра тое, што яны належаць да адзінай сыстэмы. То бок, калі нехта з украінскіх грамадзян знаходзіцца ў полі зору расейскіх спэцслужбаў і мае намер ехаць, напрыклад, у Прыбалтыку, абіраючы найкарацейшы шлях праз Беларусь, перасякае мяжу у той жа Чарнігаўскай вобласьці, едзе па тэрыторыі Беларусі, а ў гэты момант ужо фіксуецца інфармацыя пра тое, што асоба, якая іх цікавіць перасякла мяжу і даяжджае да мяжы з Прыбалтыкаю. Такога чалавека могуць недзе на дарозе перахапіць, а паколькі мяжы між Беларусьсю і Расеяй не існуе, такім чынам чалавек можа трапіць у рукі расейскіх спэцслужбаў», — патлумачыў былы намесьнік старшыні СБУ.

28 жніўня ўкраінскі афіцэр запасу Ігар Грыб заявіў пра выкраданьне спэцслужбамі Расеі яго сына ў Беларусі. 24 жніўня Павал Грыб нібыта выехаў у Беларусь на сустрэчу зь дзяўчынай, зь якой да гэтага меў зносіны толькі праз сацсеткі, пасьля чаго зьнік.

Памежная служба Ўкраіны афіцыйна пацьвердзіла факт перасячэньня Паўлам Грыбам мяжы зь Беларусьсю.

Ваша меркаваньне

Паказаць камэнтары

XS
SM
MD
LG