Вялікагрузны транспарт не дапусьцяць да месцаў масавых мерапрыемстваў падчас сьвяткаваньня Дня гораду ў Менску 9 і 10 верасьня. Пра гэта паведаміў 29 жніўня начальнік аддзелу па масавых мерапрыемствах упраўленьня аховы правапарадку і прафіляктыкі міліцыі грамадзкай бясьпекі ГУУС Менгарвыканкаму Мікалай Лужынскі, передае БалаПАН.
Такое рашэньне прынята «з улікам тых трагічных падзей, якія адбываюцца за мяжой».
«На ўсіх асноўных пунктах будуць перакрытыя пад‘езды для вялікагрузнага транспарту, каб ніхто туды не заехаў і не пацярпелі людзі», — сказаў прадстаўнік менскай міліцыі.
Паводле Лужынскага, каб не дапусьціць на мерапрыемствы грамадзян у стане алькагольнага ап‘яненьня, а таксама тых, хто мае забароненыя прадметы, будуць усталяваныя кантрольна-прапускныя пункты.
А на адкрытых пляцоўках, дзе плянуецца ўдзел у мерапрыемстве больш як 50 чалавек, выставяць па пэрымэтры ачапленьне з мабільнымі турнікетамі.
Таксама плянуецца абмежаваць дарожны рух. Транспарт пусьцяць у аб'езд.
Наезд на пешаходаў — распаўсюджаная ў апошні час тактыка тэрарыстычных нападаў радыкальных ісламістаў. Падобныя здарэньні сёлета адбыліся ў шэрагу гарадоў Эўропы.
