Лінкі ўнівэрсальнага доступу

Менчука, у якога на Новы год страляў міліцыянт, засудзілі на 5 гадоў «хатняй хіміі»


У судзе Маскоўскага раёну Менска абвешчаны прысуд 29-гадоваму супрацоўніку заводу «Керамін» Андрэю Гаўрошу, які ў навагоднюю ноч на парозе ўласнай кватэры быў паранены міліцыянтам Русланам Салаўёвым.

Ён пакараны так званай «хатняй хіміяй» — абмежаваньнем волі тэрмінам на 5 гадоў без накіраваньня ў папраўчую ўстанову. Раней пракурор Алена Крупеніна папрасіла прызначыць Гаўрошу 3 гады пазбаўленьня волі. У сваю чаргу Адвакат Юлія Станкевіч папрасіла апраўдаць свайго падабароннага. Пацярпелы сяржант міліцыі Руслан Салаўёў папрасіў прызначыць Андрэю Гаўрошу пакараньне, не зьвязанае з пазбаўленьнем волі. Гаўроша вызвалілі з-пад варты ў залі суду, ён будзе пастаўлены на адмысловы ўлік.

Міліцыянт распавёў на судзе пра абставіны сутычкі паміж ім і абвінавачаным ў навагоднюю ноч, пра тое, як і чаму страляў у Гаўроша з табэльнага пісталета, і што адбывалася зь ім у пад’езьдзе дому і ў міліцэйскім аддзяленьні пасьля інцыдэнту. Бацька Гаўроша не паверыў ніводнаму слову міліцыянта.

Колішні сьледчы пракуратуры Фрунзэнскага раёну Менску, а цяпер праваабаронца Алег Воўчак адзначаў, што міліцыянт страляў ва ўпор у жыцьцёва важныя органы чалавека, не рабіў папераджальнага стрэлу, а ў Гаўроша ў руках не было прадметаў, якія пагражалі б жыцьцю супрацоўніка міліцыі. Пры стрэле ў сьпіну, кажа Воўчак, немагчыма гаварыць пра самаабарону, і гэта сьведчыць за тое, што агнястрэльная зброя ўжытая неправамерна да бяззбройнага чалавека.

Жонка Андрэя Гаўроша
Жонка Андрэя Гаўроша

Андрэй Гаўрош з маці
Андрэй Гаўрош з маці

Ваша меркаваньне

Паказаць камэнтары

XS
SM
MD
LG