Пакет санкцыяў называюць самым радыкальным ад часоў халоднай вайны. Яны датычацца кіберзлачынцаў, кампаніяў-пастаўшчыкоў зброі прэзыдэнту Сырыі Башару Асаду і людзей, якія вінаватыя ў парушэньні правоў чалавека на ўсходзе Ўкраіны ў раёнах, падкантрольных сэпаратыстам.
Пуцін назваў санкцыі «незаконнымі» з пункту гледжаньня ўсіх міжнародных нормаў, а расьсьледаваньні аб умяшаньні ў выбары — «антырасейскай гістэрыяй». І дадаў:
«Мы, як вы ведаеце, паводзім сябе вельмі стрымана, цярпліва, але ў нейкі момант давядзецца адказваць. Немагчыма бясконца трываць нейкае хамства ў дачыненьні да нашай краіны.
Паводле яго, адказ будзе залежаць ад фінальнага тэксту закону, які цяпер абмяркоўваецца ў Сэнаце і, верагодна, будзе неўзабаве падпісаны прэзыдэнтам ЗША.
Расейскі прэзыдэнт таксама заявіў, што «шкадуе», што адносіны паміж дзьвюма краінамі сталі ахвярай унутранай палітычнай барацьбы ў ЗША і сказаў, што спадзяецца, што дыялёг паміж Масквой і Вашынгтонам урэшце палепшыцца.
У чацьвер Сэнат ЗША ўсьлед за Палатай прадстаўнікоў таксама дасягнуў дамоўленасьці, якая дазволіць яму прыняць законапраект аб санкцыях супраць Расеі.
