Лінкі ўнівэрсальнага доступу

Сям’я Рауля Валенбэрга падала ў суд на ФСБ Расеі


Партрэт Рауля Валенбэрга

Сям’я героя Другой усясьветнай вайны, швэдзкага дыплямата Рауля Валенбэрга, які выратаваў ад нацыстаў дзясяткі тысяч габрэяў, падала пазоў супраць Фэдэральнай службы бясьпекі Расеі ў Мяшчанскі раённы суд Масквы. Пра гэта агенцтву «Интерфакс» паведаміў кіраўнік аб’яднаньня «Каманда 29», адвакат Іван Паўлаў.

Сям’я дыплямата, які зьнік у савецкай турме, мае намер дамагчыся доступу да архіўных запісаў ФСБ, якія раней падаваліся ў няпоўным выглядзе.

Валенбэрг, які працаваў на дыпляматычнай пасадзе ў прадстаўніцтве Швэцыі ў Будапэшце, у ліпені 1944 году дапамог выратавацца дваццаці тысячам вугорскіх габрэяў — ён выпісаў ім адмысловыя «ахоўныя пашпарты», якія захавалі ім жыцьцё ў апошнія месяцы Галакосту. У пачатку 1945 году, пасьля ўступленьня савецкай арміі ў Будапэшт, Рауль Валенбэрг быў арыштаваны, перапраўлены ў Маскву і, як мяркуецца, памёр у савецкай турме. У кастрычніку 2016 году швэдзкія ўлады афіцыйна абвясьцілі аб сьмерці Валенбэрга.

У сакавіку сваякі дыплямата зьвярнуліся ў ФСБ па доступ да арыгіналаў дакумэнтаў Лубянской турмы і турмы Лефортава за 1945-1947 гады. Сваякам так і не ўдалося атрымаць доступ да арыгіналаў дакумэнтаў.

Ваша меркаваньне

Паказаць камэнтары

XS
SM
MD
LG