Лінкі ўнівэрсальнага доступу

У Клюшчанах на месцы згарэлага касьцёла пабудуюць капліцу. Абвешчаны збор сродкаў


У ноч на 6 чэрвеня ў вёсцы Клюшчаны Астравецкага раёну згарэў парафіяльны касьцёл Сьвятога Яўхіма. Архіўнае фота

Горадзенскі біскуп Аляксандар Кашкевіч распарадзіўся зьбіраць сродкі на будаўніцтва новай капліцы ў Клюшчанах Астравецкага раёну, якую пабудуюць на месцы згарэлага касьцёла Сьвятога Яўхіма, дзе некалі служыў паэт Казімер Сваяк.

Сьвятыня з амаль 300-гадовай гісторыяй згарэла 6 чэрвеня.

Драўляны касьцёл быў пабудаваны ў 1726 годзе і дзейнічаў да 1948 году, калі яго закрыла савецкая ўлада. У 1990-х касьцёл вярнулі вернікам.

У касьцёле ў Клюшчанах нёс служэньне ксёндз Канстанцін (Канстанты) Стаповіч (паэтычны псэўданім — Казімер Сваяк). Тут у 1915 годзе ён прамовіў адно зь першых сваіх казаньняў па-беларуску.

У клюшчанскай парафіі Казімер Сваяк арганізаваў хор, у якім граў на скрыпцы і сьпяваў. Таксама дзякуючы намаганьням сьвятара ў навакольлі былі арганізаваныя некалькі школаў зь беларускай мовай навучаньня.

Ахвяраваньні будуць зьбірацца ва ўсёй Горадзенскай дыяцэзіі ў нядзелю, 6 жніўня.

«Ад імя клюшчанскіх вернікаў зьвяртаюся да вас з просьбай быць салідарнымі і сабраць ахвяраваньні на будаўніцтва капліцы, якая павінна зьявіцца на месцы страчанага касьцёла», — заахвочвае вернікаў і ўсіх неабыякавых людзей біскуп Аляксандар Кашкевіч.

XS
SM
MD
LG