Лінкі ўнівэрсальнага доступу

Ва ўрадзе патлумачылі, чаму ўзгадняюць свае дакумэнты з БРСМ


Будаўнічы атрад БРСМ. Ілюстрацыйнае фота

У дакумэнтах ураду Беларусі выявілі, што прынамсі некаторыя выдаткі на дзяржаўныя праграмы ўзгадняюць з грамадзкім аб’яднаньнем «Беларускі рэспубліканскі саюз моладзі». Гэтая арганізацыя сама ўтрымліваецца зь дзяржаўнага бюджэту.

Дэпутатка Палаты прадстаўнікоў Ганна Канапацкая на сваёй старонцы ў фэйсбуку апублікавала пастанову Міністэрства сельскай гаспадаркі і харчаваньня «Аб зацьверджаньні інструкцыі выкарыстаньня сродкаў рэспубліканскага бюджэту, прадугледжаных на разьвіцьцё сельскагаспадарчай прамысловасьці, рыбацтва і перапрацоўкі сельскагаспадарчай прадукцыі».

Пастанова Мінсельгасхарчу ўзгодненая з больш чым двума дзясяткамі міністэрстваў, ведамстваў (у тым ліку з кіраўніцтвам справамі адміністрацыі прэзыдэнта, Міністэрствам фінансаў, Дзяржкаммаёмасьцю, Нацыянальнай акадэміяй навук ды іншымі), старшынямі аблвыканкамаў, а таксама зь першым сакратаром цэнтральнага камітэту грамадзкага аб’яднаньня «Беларускі рэспубліканскі саюз моладзі».

Дэпутатка Палаты прадстаўнікоў Ганна Канапацкая
Дэпутатка Палаты прадстаўнікоў Ганна Канапацкая

"Усе мы ведаем, што БРСМ фінансуецца зь бюджэту Беларусі, то бок кожны з нас аддае свае грошы на гэта. Задумайцеся, вы сьвядома, самастойна далі б хаця рубель гэтай арганізацыі? Улада сілай забірае ў вас гэты рубель і дае на БРСМ. Насьпеў час узьняць пытаньне, а ці згодныя мы аплочваць гэта? Але гэта яшчэ паўбяды. Нядаўна мне трапіў у рукі цікавы дакумэнт. Мала хто з вас, сябры, ведае, што, да прыкладу, парадак выкарыстаньня бюджэтных сродкаў на разьвіцьцё сельскай гаспадаркі і рыбацтва трэба ўзгадняць з БРСМ!"—піша дэпутатка Ганна Канапацкая.

Паводле статуту Беларускі рэспубліканскі саюз моладзі — грамадзкае аб’яднаньне, але фінансуецца яно зь дзяржаўнага бюджэту. Грашовую падтрымку БРСМ гарантуе ўказ Аляксандра Лукашэнкі № 559 ад 17 сьнежня 2012 году «Аб некаторых пытаньнях дзяржаўнай падтрымкі грамадзкага аб’яднаньня «Беларускі рэспубліканскі саюз моладзі», указ прэзыдэнта № 6 ад 13 студзеня 2016 году, якім бюджэтнае фінансаваньне працягнутае на 2016–2017 гады.

Свабода запыталася ў прадстаўніка ўраду Беларусі, чаму з аб’яднаньнем, якое само ўтрымліваецца зь бюджэту, трэба ўзгадняць выдаткі, да прыкладу, на разьвіцьцё сельскай гаспадаркі і рыбацтва?

Прэсавы сакратар прэм’ер-міністра Ўладзіслаў Сычэвіч такім чынам пракамэнтаваў дакумэнт Мінсельгасхарчу, на які зьвяртае ўвагу дэпутатка Ганна Канапацкая:

«Перш чым фармуецца канцэпцыя рэспубліканскага бюджэту, вывучаюцца ўсе прапановы зацікаўленых дзяржаўных органаў, структураў. І з БРСМ, атрымліваецца, таксама. Наколькі я разумею, БРСМ — рознаплянавая арганізацыя (ня тое, што гэта іх профіль), але ў тым ліку яна вырашае некаторыя пытаньні аграрна-прамысловага комплексу. БРСМ праводзіць сваю палітыку, накіраваную на разьвіцьцё АПК. Так што і іхнае меркаваньне ўлічваецца, таму і ідзе ўзгадненьне і з БРСМ таксама».

Ваша меркаваньне

Паказаць камэнтары

XS
SM
MD
LG