Лінкі ўнівэрсальнага доступу

«Седзіце, ныеце, лаеце „змагароў“, але чакаеце». Блогер разьбіраецца ў сутнасьці беларускага нараканьня


Чытач сайту Свабоды Аляксандар Яшнікаў адказвае камэнтатарам пад артыкулам «Амэрыканская пара палюбіла Беларусь за тое, чаго самі беларусы не заўважаюць».

Выйшаў на днях на сайце svaboda.org артыкул пра маіх калегаў. Пра тое, як яны, маладая амэрыканская пара, любіць Беларусь. І чаму. Пра іх падарожжы і ўражаньні ад краіны. Але гаворка не пра артыкул. Гаворка пра камэнтары пад артыкулам і на Фэйсбуку.

Вось я люблю сваю краіну і яе людзей. Але я не разумею, чаму 99,9% камэнтароў — аднатыпнае бездапаможнае ныцьцё і соплі пра тое, што добра любіць Беларусь з амэрыканскім заробкам. Твая любоў да краіны вызначаецца тваім заробкам?! Ты ня можаш сабе дазволіць зьезьдзіць у Дудуткі або ў Налібацкую пушчу? Сурʼёзна?

Ты працуеш на пана, які адабраў у цябе пашпарт, лупіць нагайкай і плаціць ежай? І нічога ня можаш зьмяніць, таму што працадаўца пагражае расправіцца з тваёй сямʼёй? А як ён пусьціў цябе ў інтэрнэт, вось у чым пытаньне... А можа ты ня быў у Налібаках не таму што ня можаш, а таму што ты лянівы тхор...

Так, дарагія мае, гэта рытарычныя пытаньні. Адказ на іх відавочны. Усе гэтыя камэнтатары проста працуюць у лепшым выпадку ў офісе і чакаюць, калі назапасяць на Логан і выплацяць за кватэрку на Каменнай Горцы. І яшчэ чакаюць, калі прыйдзе новы начальнік і зробіць ім заробак як у Амэрыцы, зыходзячы на гэтую тэму бурбалкамі ў інтэрнэце...

Вось што я табе скажу, дарагі ныючы сябар. Нават тыя мае знаёмыя, якія нылі пра тое, што тут няма чаго лавіць і трэба хутчэй валіць з гэтай краіны, і, у адрозьненьне ад цябе, паднялі свой азадак і гэта зрабілі, працягваюць ныць і клясьці ўжо новую краіну. Або ўкалваць з раніцы да вечару зараз ужо ў капіталістычным раі, чакаючы, калі на пэнсіі змогуць сабе дазволіць наведаць Парыж. Ёсьць, вядома, і тыя, хто чагосьці хутка дамогся і мае паважаную пасаду і час на падарожжа...

Уласна, як і тут, у Беларусі. Хтосьці ные, бухае і чакае, калі нехта за іх зробіць новага прэзыдэнта або пакліча іх калупаць у носе зь дзевяці да пяці за 5000 даляраў. А нехта што-небудзь робіць. Хоча падарожнічаць — падарожнічае. Хоча працаваць на сябе — прагарае, расчароўваецца, набівае гузы, але працуе. І з другіх, паверце мне, ніхто не ные ў інтэрнэце пра тое, як зручна любіць Беларусь з амэрыканскім заробкам. Яны альбо на блакітных азёрах, альбо ў Налібаках, альбо ў Парыжы, альбо працуюць.

І апошняе. Ведаеце чаму ў нас карумпаваная ўлада, няма выбараў ужо 23 гады і нашы падаткі марнуюць на парады і палацы прэзыдэнта? Таму што вы седззіце, ныеце, лаеце «змагароў», але чакаеце, калі яны выйдуць на плошчу і ўсё за вас зробяць. Менавіта таму нікога з вас не спытаюць, калі зьнясуць Асмалоўку, чарговы парк або ваш дом, таму што дзядзькі з «Газпрома» або Эміратаў далі грошы на чарговыя палацы і фаервэркі. Не спытаюць, бо ведаюць, што вы панаракаеце ў інтэрнэце і раніцай пойдзе да сябе ў офісе чакаць, калі за вас хтосьці нешта зьменіць у вашым жыцьці.

Аляксандар Яшнікаў

Меркаваньні, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

Ваша меркаваньне

Паказаць камэнтары

XS
SM
MD
LG