Лінкі ўнівэрсальнага доступу

13 ліпеня адкрываецца «Славянскі базар». А Віцебск гуляе ўжо тры дні


Афіцыйнае адкрыцьцё фэстывалю адбудзецца толькі сёньня ўвечары, але першыя канцэрты ў летнім амфітэатры ўжо адбыліся. І ўвогуле ўвесь горад выглядае, як суцэльная гандлёва-забаўляльная пляцоўка.

На «Славянскім базары» набыць можна ўсё

З 11-га ліпеня ўздоўж вуліц Леніна і Замкавай пачалі працаваць вулічныя крамкі і шапікі з таварамі беларускіх вытворцаў, на плошчы Перамогі разьмясьціліся прадстаўнікі Расеі — тут можна набыць адзеньне, сувэніры і пачастункі.

«Аснова нацыянальнай бясьпекі Русі»
«Аснова нацыянальнай бясьпекі Русі»

Вышыванкі і сувэніры з Украіны можна набыць каля ратушы і ў сквэры на вуліцы Кірава. Непадалёк, уздоўж вуліцы Ільлінскага, традыцыйна месьціцца кірмаш рамесьніцкіх і сувэнірных вырабаў, мастакі і майстры выставілі свае творы ўздоўж вуліц Суворава і Крылова. Тут жа малююць шаржы, фатаграфуюцца са зьмяёй, сьпяваюць прыпеўкі і прапануюць «натуральнае марозіва без малака»...

Вэрнісаж на вуліцы Суворава
Вэрнісаж на вуліцы Суворава

Увесь гэты рознакаляровы гармідар сьведчыць, што ў горадзе нешта адбываецца. Але цяжка здагадацца, што гэтая падзея перадусім музычная. Прынамсі, ад пачатку меркавалася, што яна будзе менавіта такой. Аднак у апошнія гады «Славянскі базар» займеў выразныя палітычныя рысы.

Лукашэнка прыедзе не адзін

Стала традыцыяй, што на адкрыцьцё фэстывалю прыяжджае Аляксандар Лукашэнка. І віцябляне штогод сутыкаюцца з усімі выдаткамі захадаў бясьпекі і памкненьняў пусьціць пыл у вочы: цэнтральныя вуліцы сьпешна прыбіраюць да бляску, а ў дварох па маршруце праходжаньня картэжу зьяўляюцца «партызаны» — людзі ў цывільным, але з рацыямі ці «навушнікамі».

Неад’емная рыса фэстывалю — ліквідацыя недаробак у апошні момант
Неад’емная рыса фэстывалю — ліквідацыя недаробак у апошні момант

13-га ліпеня Аляксандар Лукашэнка прыедзе ў Віцебск не адзін: тут маюць адбыцца перамовы з прэзыдэнтам Малдовы Ігарам Дадонам, які наведаў Беларусь з рабочым візытам. Потым абодва возьмуць удзел у цырымоніі ўрачыстага адкрыцьця фэстывалю, яно заплянаванае на 20.30.

Квіткі дарагія, праграма аднастайная, гатэлі занятыя, гарэлка паўсюль

Квіткі на гэтую фэстывальную імпрэзу традыцыйна самыя дарагія: ад 80 да 195 рублёў. Праўда, іх мала хто купляе. Месцы загадзя разьмеркаваныя, і ў глядацкіх шэрагах пераважна «правераная» публіка: чыноўнікі выканкамаў, кіраўнікі прадпрыемстваў.

Папулярная забава ў шараговых гледачоў — наведаць кірмаш сувэніраў
Папулярная забава ў шараговых гледачоў — наведаць кірмаш сувэніраў

Шараговыя гледачы выбіраюць іншыя канцэрты, пераважна прыходзячы паслухаць «зорак» расейскай эстрады. Сёлета ўжо адбыўся выступ Грыгорыя Лепса, наперадзе канцэрты Стаса Міхайлава і Валерыя Меладзэ. Цікава, што на канцэрты сваіх жа артыстаў ахвотна прыяжджаюць расейцы, жыхары памежных рэгіёнаў. Яны кажуць, што ў Расеі квіткі на выступы гэтых артыстаў каштуюць даражэй, чым на «Славянскім базары ў Віцебску», нават з улікам выдаткаў на дарогу і пражываньне. Што да апошняга, то знайсьці ў Віцебску жытло на час фэстывалю стала вялікай праблемай. Для расьсяленьня 5 тысяч артыстаў з 37 краінаў занятыя ўсе гатэлі, інтэрнаты, а таксама бліжэйшыя санаторыі і турбазы. Прычым ня толькі ў Віцебску, але і ў Воршы і Полацку таксама.

Кошты за арэнду кватэр «на суткі» падвысіліся ў разы: аднапакаёўка абыдзецца прыблізна ў 70 даляраў, а трохпакаёўка — да 200 за адны суткі. І тое, калі пашчасьціць знайсьці вольную, бо кватэры на «Славянскі базар» замаўляюць загадзя.

Манэтка на памяць. Для тых, хто не набыў летась ці пазалетась
Манэтка на памяць. Для тых, хто не набыў летась ці пазалетась

Хоць гледачам і прапанавана 20 канцэртаў, асаблівай разнастайнасьці ў праграме няма: знаёмыя па ранейшых фэстывалях беларускія і расейскія артысты, канцэрт шансону, а зоркі ўзроўню Алы Пугачовай або Філіпа Кіркорава сёлета ў Віцебск не прыедуць.

Што да імпрэзаў, на якія можна трапіць бясплатна, то і яны ўжо традыцыйная: «Горад майстроў», вэрнісаж, фэст вулічнага мастацтва «На сямі вятрах», падчас якога на адкрытых пляцоўках будуць выступаць самадзейныя артысты.

Адзіная навацыя — АМАП у блакітных камізэльках

​Адзінай навацыяй сёлетняга «Славянскага базару» будзе хіба толькі выгляд супрацоўнікаў віцебскага АМАПу, якія будуць працаваць на кантрольна-прапускных пунктах. Такіх КПП, абсталяваных мэталяшукальнікамі, будзе каля 20, палова зь іх — у раёне Летняга амфітэатру, галоўнай канцэртнай пляцоўкі фэстывалю.

Міліцэйскае кіраўніцтва сёлета вырашыла, што асабісты агляд грамадзянаў будуць праводзіць супрацоўнікі ў цывільным, але ў апранутых зьверху адмысловых блакітных камізэльках з надпісам «Бясьпека. Security». Паводле начальніка віцебскай міліцыі Івана Кубракова, гэта «псыхалягічны крок» — маўляў, каб наведнікі фэсту пачуваліся больш камфортна.

Шпацыры па горадзе або бяседы ў кавярнях — асноўны від адпачынку на «Славянскім базары»
Шпацыры па горадзе або бяседы ў кавярнях — асноўны від адпачынку на «Славянскім базары»

Усяго падчас «Славянскага базару» ў Віцебску будуць працаваць некалькі тысяч міліцыянтаў — ня толькі мясцовых ды з суседніх рэгіёнаў, але й зь Менску, Горадні і Берасьця. Сачыць за парадкам у фэстывальныя дні і сапраўды нялёгка — з улікам таго, што адменена практыка «500-мэтровай зоны», калі ў цэнтры гораду існавала забарона на продаж алькаголю.

500-мэтровую зону адмянілі
500-мэтровую зону адмянілі

«Падворкі» страцілі мясцовы калярыт і ператварыліся ў месцы для выпіўкі

Цяпер дазволена ўсё. І нават так званыя раённыя «падворкі», якія раней мусілі ўвасабляць мясцовы калярыт таго ці іншага рэгіёну, ператварыліся ў звычайныя харчовыя пункты. 20 «падворкаў» — 3 тысячы пасадачных месцаў, ня лічачы іншых вулічных кавярняў і рэстаранаў. І менавіта яны ці ня самыя папулярныя мясьціны адпачынку ў аматараў «Славянскага базару», калі няма грошай на канцэртны квіток, ня вабяць бясплатныя самадзейныя выступы і шкада траціцца на сувэніры.

Да прыёму гасьцей фэстывалю гатовыя
Да прыёму гасьцей фэстывалю гатовыя

Праўда, за 26 мінулых гадоў значная частка аматараў фэстывалю і ўвогуле перайшла на бок апанэнтаў — прыхільнікаў думкі, што «Славянскі базар» зжыў сябе і яго варта ці пераводзіць у іншы фармат ці адмяняць увогуле.

XS
SM
MD
LG