Лінкі ўнівэрсальнага доступу

Настаўніц з Маладэчна за сьмерць школьніцы на бульбе асудзілі на 2 гады «хатняй хіміі»


Настаўніцы Вольга Завадзкая і Ірына Апанасевіч

Суд Маладэчанскага раёну сёньня абвясьціў прысуд у справе гібелі на бульбе 13-гадовай Вікі Папчэні.

Выкладчыц францускай мовы Вольгу Завадзкую і фізыкі Ірыну Апанасевіч, абвінавачаных у неналежным выкананьні абавязкаў у гарантаваньні бясьпекі жыцьця і здароўя дзяцей, што пацягнула па неасцярожнасьці сьмерць васьміклясьніцы Вікі Папчэні, прыгаварылі да 2 гадоў абмежаваньня волі без накіраваньня ў месцы зьняволеньня і да штрафаў у памеры 100 базавых велічынь (2300 рублёў).

Судзьдзя зачытвае вырак
Судзьдзя зачытвае вырак

Настаўніцы пазбаўленыя таксама права выконваць працу, зьвязаную зь бясьпекай дзяцей. Як патлумачыла адвакат Натальля Кашкан, гэта азначае, што яны 2 гады выкладаць ня змогуць.

Вольга Завадзкая і Ірына Апанасевіч
Вольга Завадзкая і Ірына Апанасевіч

Таксама Маладэчанскі суд вынес прыватную пастанову ў адрас Маладэчанскага аддзелу адукацыі і турызму аб ліквідацыі прычынаў, якія прывялі да гібелі школьніцы Вікторыі Папчэні. Якія дакладна прычыны суд мае на ўвазе, у абвешчанай частцы прысуду не сказана.

Сябры і аднаклясьнікі загінулай
Сябры і аднаклясьнікі загінулай

Раней настаўніцы цалкам прызналі сваю віну. Пракурор Вікторыя Паляшчук прасіла прысудзіць кожнай па 2 гады абмежаваньня волі без накіраваньня ў папраўчую ўстанову адкрытага тыпу, прызначыць штраф у памеры 100 базавых велічынь і забараніць на працягу двух гадоў займаць пасады, зьвязаныя зь бясьпекай дзяцей.

Пракурор Вікторыя Паляшчук
Пракурор Вікторыя Паляшчук

Бацькі загінулай дзяўчынкі прасілі суд не караць школьных настаўніц. Абвяшчэньне прысуду адбылося ў адсутнасьці бацькоў Вікі. Юлія і Алег Папчэня ў нядзелю, 9 ліпеня, зьехалі зь Беларусі і плянуюць вярнуцца не раней за 21 ліпеня. Яны цяжка пераносілі судовы працэс, стаміліся ад увагі журналістаў.

Настаўніц асудзілі без накіраваньня ў калёнію
Настаўніц асудзілі без накіраваньня ў калёнію

Летась 29 верасьня падчас уборкі бульбы пад Маладэчнам загінула вучаніца 8 клясы Вікторыя Папчэня — на яе наехаў грузавік. Кіроўцу Паўлу Цыбіну 23 сьнежня 2016 году ўжо прысудзілі 3 гады абмежаваньня волі.

Як збор «прызавога» вядра бульбы скончыўся трагедыяй? Кажуць абвінавачаныя настаўніцы і кіроўца МАЗ

Ваша меркаваньне

Паказаць камэнтары

XS
SM
MD
LG