Нямецкая кампанія Siemens пацьвердзіла, што як мінімум дзьве газавыя турбіны яе вытворчасьці нелегальна трапілі ў анэксаваны Расеяй Крым. Канцэрн заявіў, што турбіны прызначаліся для энэргетычнага праекту на Таманскай паўвысьпе ў Расеі.
Siemens рыхтуе пазоў супраць супрацоўнікаў расейскай кампаніі «Технопроэкспорт». У сувязі з парушэньнем дамовы нямецкі канцэрн будзе дамагацца вяртаньня турбін у Краснадарскі край або поўнай адмены кантракту. Кампанія праводзіць ўнутраную праверку ўсіх аддзяленьняў у Расеі.
Пра тое, што газавыя турбіны вытворчасьці Siemens апынуліся ў Севастопалі ў абыход санкцый Эўрапейскага зьвязу, раней паведаміла агенцтва Reuters. У кампаніі «Технопроэкспорт» настойваюць, што турбіны для Крыму набылі на другасным рынку і правялі мадэрнізацыю ўстановак сваімі сіламі. Крэмль заявіў, што на паўвысьпе ўсталёўваюць турбіны расейскай вытворчасьці, сабраныя з расейскіх кампанэнтаў.
Пра пляны Расеі ўсталяваць у Крыме на новых электрастанцыях абсталяваньне Siemens два гады таму паведамляла газэта «Ведомости». Санкцыі Эщразьвязу забараняюць эўрапейскім кампаніям пастаўляць энэргетычныя тэхналёгіі на тэрыторыю паўвыспы.