Лінкі ўнівэрсальнага доступу

Канстанцін Бурыкін прызнаны вінаватым у незаконным захоўваньні зброі і боепрыпасаў і асуджаны на 3 гады калёніі ўзмоцненага рэжыму без канфіскацыі маёмасьці.

Бурыкін сказаў, што яшчэ ня ведае, ці будзе абскарджваць прысуд. Яго прыйшлі падтрымаць больш за 20 вернікаў. Ён да іх зьвярнуўся:

«Даруйце, што так вышла, дзякуй тым, хто мяне падтрымліваў».

У залі гучала, што прысуд несправядлівы.

Канстанцін Бурыкін
Канстанцін Бурыкін

10 ліпеня ў Заводзкім раённым судзе Менску аб’явілі прысуд Канстанціну Бурыкіну, былому настаяцелю царквы ў пасёлку Гатава пад Менскам, вядомаму таксама як «бацюшка са свастыкай» праз адпаведныя тату і сувязі з нацыяналістычнай расейскай арганізацыяй РНЕ.

Канстанціна Бурыкіна арыштавалі летась у лістападзе, суд над сьвятаром, часова адлучаным ад прыходу, праходзіць з канца чэрвеня. Бурыкіна абвінавачваюць ў незаконным захоўваньні зброі і боепрыпасаў, яму пагражала да 10 гадоў зьняволеньня.

На судзе
На судзе

На судзе віну ў захоўваньні зброі былы сьвятар прызнаў, але папрасіў суд не пазбаўляць яго волі «дзеля чацьвярых дзяцей». Свае дзеяньні Канстанцін Бурыкін патлумачыў легкадумнасьцю і расказаў, што зброю яму перадалі актывісты РНЕ, зь якімі ён падтрымліваў стасункі як сьвятар — праводзіў для іх рэлігійныя абрады. Паводле Бурыкіна, пісталетам больш за сто гадоў і для страляньня яны непрыдатныя. Між тым на працэсе прыёмны сын Бурыкіна расказаў, як з бацькам яны стралялі зь пісталета ў лесе. Таксама на судзе быў дапытаны экспэрт, які праводзіў экспэртызу знойдзенай у Бурыкіна зброі і патронаў. Паводле спэцыяліста, абодва пісталеты Бурыкіна на момант экспэртызы былі непрыдатныя для стральбы, з 10 патронаў прыдатнымі былі толькі 2. Але большасьць складовых частак пісталетаў былі ў спраўным стане, іх можна было выкарыстаць паводле прызначэньня пры замене няспраўных частак, мяркуе экспэрт.

Канстанцін Бурыкін у апошнім слове прасіў прабачэньня і падкрэсьліваў, што ў ягонай асобе на лаве падсудны знаходзіцца звычайны чалавек, а не фашыст паводле палітычных поглядаў. Бурыкін ня ўтойваў, што раней прытрымліваўся нэанацысцкіх поглядаў, але адмаўляў, што займаўся прапагандай экстрэмізму і фашызму. Наяўнасьць у ягоным доме кніг і кампакт-дыскаў пра нацысцкую Нямеччыну Бурыкін патлумачыў захапленьнем гісторыяй. Пра другую сэнсацыйную знаходку сьледчых — жырандолю ў выглядзе свастыкі — падсудны сказаў, што для яго свастыка ёсьць рэлігійным сымбалем, а не сымбалем Нямеччыны часоў Гітлера.

Ваша меркаваньне

Паказаць камэнтары

XS
SM
MD
LG