Гэтую інфармацыю пацьвердзілі Радыё Свабода ў адной з раённых бібліятэк. Па словах супрацоўніцы бібліятэкі, вуснае распараджэньне зь Міністэрства культуры Архангельскай вобласьці паступіла яшчэ ў чэрвені.
«Сэрца крывёю абліваюцца, гэта ж і руская клясыка, і замежная, выдатныя даведнікі — усе гэтыя кнігі выдатна выдадзеныя і вельмі запатрабаваныя, — распавядае працаўніца бібліятэкі. — У сьпіс рэкамэндаваных да канфіскацыі патрапілі Пушкін, Дастаеўскі, Чэхаў, Талстой, вельмі шмат дзіцячай літаратуры, нават Карней Чукоўскі. Да нас школьнікі прыходзяць цяпер са сьпісамі літаратуры, рэкамэндаванай да чытаньня на лета, а мы ім іх ня выдаём».
Па словах супрацоўніцы, адбіраюцца ўсе кнігі зь пячаткамі «Пушкінскай бібліятэкі» інстытуту «Адкрытае грамадзтва».
«Іх масава прывозілі да нас на пачатку 2000-х, потым разьмяркоўвалі па ўсіх бібліятэках, дзесьці аказалася 50-80 асобнікаў, дзесьці больш за сотню. Гэта, вядома, поўны абсурд: ну да, прызналі дзейнасьць Фонду Сораса непажаданай у Расеі, але пры чым тут кнігі? Нам толькі сказалі, што рашэньне гэта ідзе зьверху, і загадалі іх прыбраць ад граху падалей», — тлумачыць жанчына, якая папрасіла не называць яе прозьвішча, таму што баіцца, што інакш яна можа застацца бяз працы.
У прэс-службе Міністэрства культуры Архангельскай вобласьці Радыё Свабода заявілі, што пра канфіскацыю кніг зь бібліятэк чуюць упершыню, паабяцаўшы адказаць на пісьмовы запыт. Адказ на запыт пакуль не паступіў.