24 чэрвеня танк на вялікай хуткасьці пайшоў у занос і ўрэзаўся ў слуп на сталічным праспэкце Незалежнасьці. Ніхто не пацярпеў, хоць слуп быў зьнесены, машына атрымала тэхнічныя пашкоджаньні.
Як заявіў сёньня падчас прэс-канфэрэнцыі старшы інспэктар па асаблівых даручэньнях аддзелу ДПС УДАІ Менгарвыканкаму Міхаіл Карніевіч, тое, як будзе кваліфікавана здарэньне і якія санкцыі ўжывуць да яго ўдзельнікаў, ведамства вырашыць у залежнасьці ад вынікаў праверкі. Карніевіч паабяцаў, што пра вынікі будзе паведамлена дадаткова.
У Міністэрстве абароны Беларусі заявілі, што інцыдэнт з танкам быў абумоўлены складанымі дарожнымі ўмовамі — перад гэтым прайшоў дождж, асфальтавае пакрыцьцё для гусенічнай машыны аказалася занадта сьлізкім. Паводле ведамства, баявая машына была цалкам спраўнай.
