Дэпартамэнт авіяцыі Міністэрства транспарту і камунікацый Беларусі пакуль не атрымліваў афіцыйнай інфармацыі пра інцыдэнт з цывільным самалётам АН-2 на мяжы зь Літвой.
Пра гэта агенцтву БелТА паведаміў кіраўнік дэпартамэнту Ўладзімер Косьцін.
«Мы чакаем афіцыйнай інфармацыі ад літоўскага боку наконт інцыдэнту з самалётам Ан-2, — адзначыў ён. — Цяпер ідзе зьверка дадзеных сродкаў аб’ектыўнага кантролю як зь беларускага, так і зь літоўскага боку. Як толькі зьявіцца афіцыйнае пацьверджаньне, будуць прынятыя пэўныя захады ў залежнасьці ад атрыманых дадзеных».
Хутчэй за ўсё, як мяркуе беларускі бок, паветранае судна выконвала палёт для маніторынгу палеткаў.
Напярэдадні агенцтва BNS паведаміла, што беларускі самалёт Ан-2 парушыў паветраную прастору Літвы. Міністэрства абароны Літвы канстатавала два выпадкі парушэньня дзяржаўнай мяжы ў сярэдзіне дня 21 чэрвеня у раёне населеных пунктаў Дубічай і Мустэйка. Парушэньне зафіксавана сродкамі назіраньня вайскова-паветраных сілаў і візуальна.
У сувязі з надзвычайным здарэньнем служба аховы дзяржаўнай мяжы Літвы пачала дасудовае расьсьледаваньне. Як заявіла прэс-аташэ міністра замежных спраў Літвы Раса Якілайцене, у сувязі з інцыдэнтам будзе ўручаная нота Часоваму паверанаму ў справах Беларусі ў Літве.
Сёлета ў красавіку паветраную прастору Беларусі з боку Літвы парушыў лёгкі самалёт P46T, якім кіраваў грамадзянін Даніі. Самалёт падняўся зь Віленскага аэрапорту і праігнараваў прадугледжаны плянам палёту маршрут. У выніку самалёт на некалькі кілямэтраў заглыбіўся на тэрыторыю Беларусі.
