Лінкі ўнівэрсальнага доступу

Мядзьведзеў забаніў у «Твітэры» змагара з карупцыяй, той падаў у суд


Ілюстрацыйнае фота

Супрацоўнік аддзелу расьсьледаваньняў Фонду барацьбы з карупцыяй Георгій Албураў падаў у суд на прэм’ер-міністра Расеі Дзьмітрыя Мядзьведзева за тое, што той заблякаваў яго ў «Твітэры».

Пра гэта паведамляе сайт апазыцыянэра Аляксея Навальнага, заснавальніка згаданага фонду. Апанэнты Крамля абвясьцілі вайну карупцыянэрам, кіраўніку ўраду ў тым ліку.

На думку юрыстаў фонду, мікраблог Дзьмітрыя Мядзьведзева зьяўляецца афіцыйнай крыніцай інфармацыі, паколькі спасылка на яго пазначаная на сайце ўраду Расеі.

У ФБК лічаць, што Мядзьведзеў парушыў прынцып галоснасьці працы Кабінэту міністраў, пазбавіўшы Албурава магчымасьці чытаць ягоны «Твітэр». У базе дадзеных Прэсьненскага суду Масквы пазоў пакуль не зарэгістраваны.

У сакавіку Фонд барацьбы з карупцыяй апублікаваў расьсьледаваньне аб нерухомасьці, якой нібыта валодае Дзьмітрый Мядзьведзеў. Прэм’ер-міністар раней забаніў у сваім мікраблогу заснавальніка фонду Аляксея Навальнага і супрацоўніка аддзелу расьсьледаваньняў Георгія Албурава. Публікацыі ФБК Мядзьведзеў назваў «хлусьлівымі прадуктамі палітычных прайдзісьветаў».

XS
SM
MD
LG