Лінкі ўнівэрсальнага доступу

Пазьняк заклікае вернікаў падаваць у суд на Алексіевіч


Зянон Пазьняк раскрытыкаваў словы Сьвятланы Алексіевіч падчас жывога эфіру на тэлеканале «Дождь».

9 чэрвеня беларуская нобэлеўская ляўрэатка, сярод іншага, сказала:

«Вайна, якую пачала Расея ў Данбасе — на сумленьні Расеі. Такую вайну можна пачаць і ў Беларусі. Дайце туды танкі, дайце туды зброю, і католікі будуць забіваць праваслаўных ці каго заўгодна».

Паводле Пазьняка, заява Алексіевіч накіраваная перш за ўсё на распальваньне рэлігійнай і сацыяльнай варожасьці ў беларускім народзе.

«Не прыпамінаю, каб хто калі (нават у асяродзьдзі адкрытых ворагаў Беларусі) гэтак казаў. Другое — такая заява накіравана на дэзынфармацыю заходніх палітыкаў і заходняга абывацеля, якія нічога ня ведаюць пра Беларусь і жывуць стэрэатыпамі Паўночнай Ірляндыі, Сэрбіі, Босьніі ды Косава. Хрысьціянства ў гэтай заходняй лібэралістычнай бюракратыі і ахлакратыі зьніжана, перакручана і не ў пашане», — напісаў Зянон Пазьняк.

Старшыня КХП-БНФ прапануе Сьвятлане Алексіевіч папрасіць прабачэньня ў беларусаў за распальваньне рэлігійнай і сацыяльнай варожасьці.

«Першае, што трэба зрабіць, гэта (пажадана разам і каталікам, і праваслаўным) зьвярнуцца ў суд аб узбуджэньні крымінальнай справы супраць грамадзянкі Сьвятланы Алексіевіч паводле артыкулу 130 Крымінальнага Кодэксу Рэспублікі Беларусь. — Распальваньне расавай, нацыянальнай, рэлігійнай альбо іншай сацыяльнай варожасьці альбо розьні».

Пазьняк падтрымаў адкрыты зварот мітрапаліта Тадэвуша Кандрусевіча, у якім герарх сьцьвярджае, што ў Беларусі «гістарычна склаліся добрыя як міжканфэсійныя, так і міжрэлігійныя адносіны».

Ваша меркаваньне

Паказаць камэнтары

XS
SM
MD
LG